बंगलादेश युएई र ओमानमा जारी आईसीसी टी ट्वान्टी विश्वकप क्रिकेटको सुपर १२ मा प्रबेश गरेको छ । आज भएको खेलमा दोस्रो जित निकाल्दै बंगलादेशले सुपर १२ मा स्थान बनाएको हो । आज पपुवा न्यू गिनी पीएनजी लाई ८४ रनले पराजित गर्दै बंगलादेशले दोस्रो जित निकालेको हो । बंगलादेशले पिएनजीलाई १ सय ८२ रनको लक्ष्य प्रस्तुत गरेको थियो ।
लक्ष्य पछ्याउँदै जवाफी ब्याटिङ गरेको पीएनजी १९ ओभर ३ बलमा अलआउट हुँदै ९७ रनमा समेटिए पछि बंगलादेशले जित निकालेको थियो ।पीएनजीका किप्लिन डोरिगाले सर्वाधिक ४६ रन बनाए । पीएनजीलाई सस्तैमा समेट्न बंगलादेशका शकिब अल हसन एक्लैले ४ विकेट लिए । मोहमद सैफुदीन र ताक्सिन अहमेदले समान दुई दुई विकेट लिए । यस अघि पहिले ब्याटिङ गरेको बंगलादेशले २० ओभरमा ७ विकेट गुमाएर १ सय ८१ रन बनाएको थियो ।
बंगलादेशका लागि कप्तम महमुदउल्लाहले ५० रनको अर्धशतकीय इनिङ्स खेले । यस्तै शकिब अल हसनले ४६ रन जोड्दा लिटोन दासले २९ रन बनाएका थिए । पीएनजीका डामिन राभु, काबुआ मोरिया र असाद भालाले २-२ विकेट लिए । बंगलादेशले ३ खेलमा ४ अंक जोडेको छ ।बंगलादेश शीर्ष स्थानमा समेत उक्लिएको छ ।
