चितवन, १ कात्तिक – भरतपुर महानगरपालिका–४ दुर्गा चोकमा महानवमीका दिन गैरदलित दुई पुरुषको कुटाईबाट स्थानीय ५८ वर्षीय दलित समुदायका भिमबहादुर विकको मृत्यु भयो । कुटपिटमा संलग्न ४० वर्षीय सिताराम बस्नेत र ३६ वर्षीय दिलिप श्रेष्ठलाई प्रहरीले सोही दिन पक्राउ पनि गर्यो ।
प्रहरीले मादक पदार्थ सेवन गरि चोकमा अपशब्दसहित हो–हल्ला गरेपछि स्थानीयको कुटपिटबाट विकको मृत्यु भएको प्रारम्भिक जानकारी दिएको छ । तर दलित समुदायका विभिन्न संघसंस्थाले भने उक्त घटनालाई जातीय विभेदको मुद्दातर्फ मोड्ने प्रयास गरेका छन् । उनीहरू मृतक विक दुर्गा मन्दिरमा गएका बेला स्थानीय दुई पुरुषले कुटपिट गरि हत्या गरेको आरोप लगाएका छ ।
चितवन प्रहरीका अनुसार मृतक विक महानवमीका दिन मदिरा सेवन गरि अपशब्दसहित हो–हल्ला गर्दै दुर्गा चोकमा पुगेका थिए । अपशब्द प्रयोग गरेपछि स्थानीय सिताराम बस्नेतले विकलाई प्लाष्टिकको पाइपले हानेर लखेटेका थिए । त्यसको करिब १० मिनेटपछि अपशब्द प्रयोग गरि हल्ला गर्दै विक पुनः चोकमा पुगेका थिए ।
हत्या आरोपी दिलिपले सञ्चालन गरेको फार्मेसी अगाडी पुगेर हल्ला गरेपछि उनले पनि विकलाई एक झापड हानेको अनुसन्धानबाट खुलेको जिल्ला प्रहरी कार्यालय चितवनका प्रवक्ता डिसपी सूर्यबहादुर थापाले जानकारी दिए । मदिराले लट्ठ भएका विक एक झापडमै भुईमा पछारि र उनको टाउकोको पछाडीको भागमा चोट लागेको थियो । सुरुमा दिलिपले नै आफ्नो फार्मेसीमा विकको उपचार गर्न खोजेका थिए ।
सामान्य उपचारले नहुने देखेपछि दिलिपले नै विकलाई उपचारका लागि चितवन मेडिकल कलेज पुर्याएका थिए । अस्पताल पुगेपछि अस्पतालले विकको मृत्यु भइसकेको घोषणा गरेको जिल्ला प्रहरी प्रवक्ता थापाले बताए । ‘देख्ने मान्छेहरुसँग प्रारम्भिक रुपमा बुझ्दा पनि जातको कुरालाई लिएर वा मन्दिरमा पस्न नदिएको कारण घटना भएको भन्ने आएको छैन,’ थापाले भने ।
भरतपुर अस्पतालमा मृतकको शव पोष्टमार्टम गरिएको छ । अस्पतालले प्रहरीलाई पोष्ट मार्टमरिपोर्ट दिइसकेको भए पनि प्रहरीले रिपोर्ट भने गोप्य नै राखेको छ । मृतकका आफन्तहरुले शव भने बुझेका छैनन् ।
मृतकका आफन्तले जाहेरी दिएपछि प्रहरीले घटना भएकै दिन दुई जनालाई नियन्त्रणमा लिएको हो । चोकको एक पसलमा राखिएको सिसि क्यामराको फुटेज हेरेर थप अनुसन्धान भइरहेको प्रवक्ता थापा बताउँछन् । पसल सन्चालक दसैं बिदामा गएकाले उनी आएपछि मात्रै फुटेज हेर्ने उनले बताए । ‘एउटा पसलमा सिसि क्यामरा राखेको रहेछ । त्यसले घटनाको दृश्य कभरेज गरेको छ कि छैन हेर्नुपर्छ । अब पसल सन्चालक आएपछि मात्रै त्यो हेर्न सकिन्छ’, उनले भने ।
स्थानीय दलित समुदायका एक अगुवाका अनुसार मृतक विक यसअघि पनि मदिरा सेवन गरि हो–हल्ला गर्दै हिँड्थे । जातका आधारमा कुटपिट नभएको र कुटपिट गर्नेहरूमा मार्ने नियत पनि नदेखिएको उनले बताए । ‘मैले सार्वजनिक रुपमा भन्न मिल्ने अवस्था छैन । तर घटनाका हिसाबले उनीहरूको मार्ने नियत होइन । जातीय छुवाछुतको गुन्जायस पनि देख्दिन । दलितवादीले अर्कैतर्फ केन्द्रित गर्न खोजे’, उनले भने ।
दुर्गा चोकबाट करिब तीन सय मिटर दक्षिणतर्फ मृतक विकको घर छ । उनको श्रीमती, एक छोरा र तीन छोरी छन् । छोराले पेन्टिङको काम गर्दै आएका छन् । छोरीहरूको विवाह भइसकेको छ । मृतक विक स्थानीय पुराना बासिन्दा हुन् । संयुक्त दलित संघर्ष समिति चितवनले जातीय विभेदकै कारण भिमबहादुर विकको हत्या भएको भन्दै पिडकलाई कडा कारबाही गर्न माग गरेको छ ।
