बागलुङ, २० असोज – भोलिदेखि बडादशैँ सुरु हुँदैछ । दशैँमा शक्ति स्वरुपा नवदुर्गाको पूजा हुन्छ । यहाँका शक्तिपीठ पनि पूजाको सुरसारमा छन् । लामो निषेधाज्ञापछि पर्वका मुखमा खुलेका शक्तिपीठ चहलपहलमय बन्दैछन् ।

प्रसिद्ध कालिका भगवती मन्दिरमा दशैँभर हुने विशेष पूजाआजाका लागि व्यवस्थापकीय तयारी थालिएको छ । भगवतीको दर्शनका लागि नवरात्रभर दशौँ हजार भक्तजन यहाँ आउँछन् । सोह्र श्राद्धका बेला पूजा नचल्ने भएकाले पनि घटस्थापनाका दिनदेखि भक्तजनको घुइँचो लाग्छ ।चुस्त, छरितो र सुरक्षित पूजाआजाको प्रबन्धका लागि सबै उपाय लगाइने मन्दिर गुठी व्यवस्थापन समितिले जनाएको छ । समितिका अध्यक्ष राजु खड्काले काभिड–१९ सङ्क्रमणको जोखिमलाई दृष्टिगत गरी मन्दिर परिसरमा जनस्वास्थ्यका मापदण्ड लागू गरिने बताउनुभयो ।

“कोही शङ्कास्पद देखिएमा प्रवेशद्वारमै ज्वरो नाप्ने व्यवस्था मिलाएका छौँ”, उहाँले भन्नुभयो, “मन्दिर जानुपूर्व साबुनपानीले हात धुनका लागि ठाउँ तोकिएको छ, मास्क लगाउन र भौतिक दुरी कायम गर्न सबैमा सार्वजनिक अपिल गरिएको छ ।”

मन्दिरमा भीडभाड हुँदा सङ्क्रमण फैलन सक्ने भन्दै स्थानीय प्रशासनले पनि स्वास्थ्य सुरक्षाका मापदण्ड अनिवार्य पालना गर्न÷गराउन भनेको छ । अध्यक्ष खड्काले सुरक्षा, सरसफाइ, खानेपानी, शौचालय आदिको पनि यथोचित प्रबन्ध गरिएको बताउनुभयो ।भक्तजनको लाम र पूजा व्यवस्थापन गर्न मन्दिरमा प्रहरी नै खटाउनुपर्ने हुन्छ । पाँच सय वर्ष पुरानो कालिका भगवतीमा बडादशैँ र चैत्राष्टमी पर्वमा मेलै लाग्छ । दशैँको नवरात्रमा महाकाली, महालक्ष्मी र महासरस्वतीको धुमधाम पूजा गरिन्छ ।

अष्टमी र नवमीको दिनमा भाकलको बली दिने चलन छ । मन्दिरमा कुखुरा, बोका र राँगाको बली दिइन्छ । कालिकाको दर्शन गर्दा मनोकांक्षा पूरा हुने विश्वासमा देश विदेशबाट शक्तिपूजक भक्तजन यहाँ आउँछन् । बिहान ३ बजेदेखि नै पूजाका लागि मन्दिर खुल्छ ।

अध्यक्ष खड्काले घटस्थापनामा मन्दिरमा जमरा राख्ने चलन रहेको सुनाउनुभयो । “कोभिड–१९ ले गर्दा बीचमा मन्दिर खोल्न असहज स्थिति बन्यो, भक्तजनले अब भने परम्परा र रीतपूर्वक नै पूजा गर्ने वातावरण बन्छ”, उहाँले भन्नुभयो । कालिका भगवतीसँगै गलकोट नगरपालिकास्थित ऐतिहासिक कोतघर, जैमिनीको थन्थाप माईलगायत यहाँका कैँयन शक्तिपीठमा दशैँमा धुमधाम पूजा हुने गरेको छ । ति कोतघर र मन्दिरले पनि पूजा व्यवस्थापनको तयारी गरेका छन् ।