एजेन्सी – अमेरिकी राष्ट्रपति जोन बाइडेनले कोभिड–१९ नियन्त्रणका लागि विभिन्न नयाँ नियम घोषणा गरेका छन् । डेल्टा भेरिअन्टका कारण अझै पनि दिनँहु ठूलो संख्यामा अमेरिकीको मृत्यु भइरहेका बेला राष्ट्रपति बाइडेनले नयाँ नियम घोषणा गरेका हुन् । घोषित नयाँ नियम अनुसार ठूला कम्पनीका सम्पूर्ण कर्मचारीले अनिवार्य खोप लगाएको हुनुपर्ने छ । त्यस्तै, उनीहरुले साप्ताहिक रुपमा आफ्ना कर्मचारीको कोभिड परीक्षण गराउनुपर्नेछ ।
८ करोडले अझै लगाएनन् खोप : ८ अहिले पनि कोरोनाका कारण दैनिक औषतमा दुई हजार जनाको मृत्यु हुने गरेको छ । कोरोनाबाट अमेरिकामा अहिलेसम्म साढे ६ लाख ७४ हजारको मृत्यु भइसकेको छ । अहिले दिनहुँ डेढ लाख भन्दाबढी अमेरिकी संक्रमित हुने गरेका छन् । नयाँ नियमले करोडौं अमेरिकी प्रभावित हुनेछन् । अझै पनि अमेरिकामा ८ करोडले कोभिडबिरुद्धको खोप लगाएका छैनन् ।
खोप लगाएको प्रमाण पेस गर्नुपर्ने : शुक्रबार ह्वाइट हाउसमा सम्बोधन गर्दै राष्ट्रपति बाइडेनले एक सय जना कर्मचारी हुने हरेक कम्पनीले आफ्ना सबै कर्मचारीले खोप लगाएको प्रमाण पेस गर्नुपर्ने र साप्ताहिक रुपमा कोभिड परीक्षण गर्नुपर्ने बताए । ‘यो अभिव्यक्ति स्वतन्त्रता वा व्यक्तिगत छनौटको विषय होइन । तपाईँहरुको जीवन रक्षा गर्न नयाँ नियम ल्याइएको हो । ’
संघीय सरकारले उपलब्ध गराएको सुविधा लिइरहेका १७ करोड स्वास्थ्य सेवा कर्मचारीले पनि पछिल्ला नियम पालना गर्नुपर्ने हुन्छ । सरकारको नयाँ घोषणाको रिपब्लिकनले बिरोध गरेको छ ।
