राष्ट्रियतालाई सर्लक्कै बोेकेर फिल्म बनाउन माहिर मानिएका नायक , निर्माता तथा निर्देशक नवल खड्काले फेरी अर्काे फिल्म ल्याउने तयारी गरिरहेका छन् । उनले अब नेपाल भारत सिमामा बर्षाै देखी आईरहेको समस्यालाई लिएर फिल्म बनाउन लागेका हुन् ।
उनका अनुसार यो फिल्मले समस्या देखाउने मात्र हैन दुबै देशलाई असर नपार्ने गरी समाधान समेत दिने दाबी गरे । उनकै निर्देशनमा बन्न लागेको यस फिल्मको नाम पनि काँडेतार राखिएको छ । नाम बाटै पनि थाहा हुन्छ यसले नेपाल भारतबीचको सिमामा भएको बिबादलाई बलियो रुपमा उठाएको छ ।
नेपाल र भारतको सीमालाई व्यवस्थापन गर्नुपर्ने कथावस्तुमा निर्माण हुन लागेको फिल्म राष्ट्रभक्तिले ओतप्रोत हुने निर्देशक नवलले बताएका छन् । उनले यो कुरा पनि प्रष्ट पारेका छन् कि फिल्म कुनै देश बिरुद्ध छैन । उनले यो फिल्म भारतमा पनि रिलिज हुने बताए । यसैक्रममा यस फिल्ममा मुख्य पात्रका रुपमा अभिनेता गौरव पहारी पनि समेटिएका छन् ।
खड्काले मंगलबार फिल्मको मुख्य भूमिकाको लागि पहारीलाई अनुबन्धित गरेको जानकारी दिए । यस फिल्ममा खड्का आफैले पनि अभिनय गर्नेछन् भने पछिल्लो समयमा निक्कै चर्चित रहेका रबिन्द्र रञ्जन झा पनि फिल्ममा देखिने छन् ।
यसअघि नवल खड्काले राष्ट्रियताको बिषयमा दशगजा, भिमदत्त लगायत फिल्म बनाई सकेका छन् । यो फिल्म डेढ करोड लागतमा निर्माण सक्ने योजना बनाएको उनले बताएका छन् । कोरोनाको महामारी कम भएपछि सरकारले अनुमति दिए संगै शुटिंगमा निस्कने नवलले बताए ।
