काठमाडौं २ भदौ । नेकपा माओवादी केन्द्रका अध्यक्ष पुष्पकमल दाहाल प्रचण्डले कम्युनिष्ट पार्टीभित्रै फाँसीवादी प्रवृत्ति हावी भएको बताएका छन् ।
आज बुधबार रामवृक्ष यादवको २७ औं स्मृति दिवसको अवसरमा पार्टी कार्यालय पेरिसडाँडामा आयोजित कार्यक्रमलाई सम्वोधन गर्दै अध्यक्ष प्रचण्डले यस्तो बताएका हुन् ।
कार्यक्रममा माओवादी कै त्याग र बलिदानबाट मुलुकमा परिवर्तन सम्भव भएको दावी गरेका प्रचण्डले आग्रह, पूर्वाग्रह, अवसर र स्वार्थमाथि विजय हासिल गर्न आफुभित्रका कमीलाई सच्याउने संकल्प गनुपर्ने समेत बताएका छन् ।
कम्युनिष्ट पार्टीभित्रै फाँसीवादी प्रवृत्ति हावी भएको बताएका प्रचण्डले यस्ता प्रवृतिप्रति नझुक्ने अडान सहित संघर्षमा होमिनुपरेको बताएका छन् ।
कार्यक्रमा अध्यक्ष प्रचण्डले मुलुकमा संघीय लोकतानित्रक गणतन्त्र स्थापनापछि संविधान जारी भएपनि समाजवादको यात्रा अझै जारी रहेकाले सबै एकजुट भएर अघि बढ्न आग्रह समेत गरेका छन् ।
