काठमाडौँ २६ साउन । नेकपा एमालेका सांसद खिमलाल भट्टराईले सत्तारुढ नेपाली कांग्रेस दयनीय अवस्थामा भएको बताएका छन् ।
आज मंगलबार राष्ट्रिय सभाको बैठकमा बोल्दै नेता भट्टराईले कांग्रेस कुहिराको काग भएको भन्दै यस्तो टिप्पणी गरेका हुन् । सरकारमा रहेकाले कांग्रेस बलियो छ भन्ने मात्र लागेको तर विचारधाराको हिसावले कांग्रेस मृत्युप्राय: भइसकेको भट्टराईको दावी रहेको छ ।
यो सरकारले लिपुलेक, कालापानी हाम्रो हो भन्न नसक्ने बताएका उनले भने, ‘कांग्रेस कुहिरोको काग भएको छ । माओवादी वैशाखीको खोजीमा छ । माओवादीका साथीहरुले समीक्षा गरे हुन्छ, कहिले एमालेको पछि लागेर कहिले कांग्रेसको पछि लागेर आफ्नो अस्तित्वको रक्षा गर्नुपरेको छ ।’
बैठकमा उनले अध्यक्ष केपी ओली राजनेता भएको दावीका साथ राजनीति राजनेताकै वरीपरी घुम्ने समेत बताएका छन् ।
