काठमाडौं, वैशाख ८। नेपाली चलचित्र क्षेत्रमा विशिष्ट योगदान पुर्याउने कलाकारहरूलाई सम्मान गर्ने उद्देश्यले प्रदान गरिँदै आएको ‘हरितारा चलचित्र पुरस्कार’ यस वर्ष अभिनेता टिका पहारी र अभिनेत्री रेजीना उप्रेती लाई प्रदान गरिने भएको छ।
वैशाख ४ गते हरितारा चलचित्र पुरस्कारका संरक्षक मनोज शम्शेर जबराको अध्यक्षतामा बसेको बैठकले वि.सं. २०८० को पुरस्कार वरिष्ठ अभिनेता टिका पहारीलाई र २०८१ को पुरस्कार चर्चित अभिनेत्री रेजीना उप्रेतीलाई प्रदान गर्ने निर्णय गरेको हो।
वि.सं. २०५२ मा समाजसेवी विजया राणा (तारानानी) ले स्व. पति हरि शम्शेरको सम्झनामा स्थापना गरेको यो पुरस्कार नेपाली चलचित्र क्षेत्रको पहिलो औपचारिक पुरस्कारको रूपमा परिचित छ।
पुरस्कार विवरण
४ दशकभन्दा बढी समयदेखि अभिनयमार्फत नेपाली चलचित्रको उत्थानमा योगदान दिँदै आएका टिका पहारी र दुई दशकदेखि सक्रिय रेजीना उप्रेती लाई जनही २५,००० रुपैयाँ राशिको थैली र सम्मानपत्र प्रदान गरिनेछ।
यसअघि यो पुरस्कार बसुन्धरा भुषाल, भुवन चन्द, कृष्ण मल्ल, मदन दास श्रेष्ठ, रेखा थापा, दीपक राज गिरी, दिपाश्री निरौला, करिष्मा मानन्धर, विदुर गिरी लगायत थुप्रै कलाकारहरूले प्राप्त गरिसकेका छन्।
नयाँ पुरस्कारको सुरुवात
बैठकले यस वर्षदेखि ‘हरितारा चलचित्र पत्रकारिता पुरस्कार’ पनि स्थापना गर्ने निर्णय गरेको छ, जसअन्तर्गत पहिलो पुरस्कार सञ्चारकर्मी विष्णु सुवेदी लाई प्रदान गरिनेछ। पुरस्कार राशी १०,००० रुपैयाँ रहनेछ।
परिवर्तन नेपालको सम्मानहरू
यता, वैशाख ५ गते बसेको परिवर्तन नेपालको बैठकले कलाकार तथा अधिवक्ता कृष्ण ढुंगाना र निर्देशक/सञ्चारकर्मी सम्झना उप्रेती रौनियार लाई ‘श्रीमती दुर्गादेवी पूण्य निरौला स्मृति पुरस्कार’ प्रदान गर्ने निर्णय गरेको छ। पुरस्कार राशी जनही १०,००० रुपैयाँ रहेको छ।
परिवर्तन चलचित्रकर्मी विशेष सम्मान २०८१
परिवर्तन चलचित्र पत्रकारिता सम्मान २०८१
यी पुरस्कार र सम्मानहरूको सिफारिस मोहन निरौला, सुन्दर श्रेष्ठ र शान्तिप्रिय सम्मिलित समितिले गरेको हो।
सम्बन्धित सबै पुरस्कार तथा सम्मानहरू आगामी जेठको पहिलो हप्तामा विशेष समारोह मार्फत प्रदान गरिनेछ। कार्यक्रमको संयोजन निर्देशक देवेन्द्र पाण्डे ले गर्नेछन् भने सञ्चालन निर्देशक माधव राज खरेल द्वारा गरिनेछ।
