काठमाडौँ – खानेपानी मन्त्री प्रदीप यादवले नेपाली जनताको विश्वास जित्न आवश्यक सम्पूर्ण पहल, लगानी र समन्वयमा निरन्तरता दिने दृढ प्रतिबद्धता व्यक्त गर्नुभएको छ। काठमाडौँ उपत्यका खानेपानी व्यवस्थापन बोर्डको २०औँ वार्षिकोत्सव समारोहलाई सम्बोधन गर्दै मन्त्री यादवले नीति निर्माणमा जनताको आवाजलाई प्राथमिकता दिइने र कार्यान्वयनमा पारदर्शिता तथा परिणाममुखीता सुनिश्चित गरिने बताएका हुन्।
खानेपानीलाई दीर्घकालीन, दिगो र समावेशी दृष्टिकोणबाट अघि बढाउने तयारी
मन्त्री यादवले खानेपानी सेवालाई जनजीवनसँग प्रत्यक्ष जोडिएको संवेदनशील अधिकारको रूपमा व्याख्या गर्दै नीतिगत, प्रविधिगत र प्रशासनिक सुधारमार्फत सरकार र बोर्ड मिलेर दीर्घकालीन समाधानतर्फ अघि बढ्ने उल्लेख गरे। उनले बोर्डका योजनाहरूले नागरिकको जीवनस्तर, जनस्वास्थ्य र वातावरणीय दिगोपनमा अतुलनीय योगदान दिएको पनि बताए।
२० वर्षे यात्रामा परिपक्वता र सफलताको सन्देश
बोर्डको २० वर्षे यात्रा स्मरण गर्दै मन्त्री यादवले यस संस्थाले दूरदर्शी सोच र दृढ सङ्कल्पका साथ स्थापनापछि परिपक्वताको चरणमा प्रवेश गरिसकेको बताए। “काठमाडौँ उपत्यकामा सुरक्षित, दिगो र समावेशी खानेपानी सेवा पुर्याउने लक्ष्यमा बोर्ड सफल हुँदै आएको छ,” उनले भने।
बोर्डद्वारा सम्पन्न कार्य र उपलब्धिहरू
कार्यक्रममा कार्यकारी निर्देशक डा. शञ्जिवबीक्रम राणाले ४०० भन्दा बढी स्थानमा वर्षा पानी सङ्कलन प्रणाली स्थापनाबाट करिब १ लाख जनसंख्या लाभान्वित भएको, २०३ वटा ढुङ्गेधारा, इनार र कुँवा संरक्षण गरिएको, ३१ स्थानमा पानी एटिएम प्रणालीमार्फत गुणस्तरीय पिउने पानी सर्वसुलभ बनाइएको जानकारी दिए।
त्यस्तै, ७४४ डिप ट्युववेलको अनुमति, डिजिटल म्यापिङ, मोबाइल एपमार्फत प्रविधिमैत्री व्यवस्थापन, सुन्दरीजल प्रशोधन केन्द्र, ७४.७ किमी पाइपलाइन तथा ९ वटा पानी पोखरी निर्माण सम्पन्न गरिएको जानकारी पनि उनले साझा गरे।
चुनौती र सुधारको आवश्यकता
राणाले भने, “पुरानो पाइपलाइन संरचनाले पानी चुहावट, भूमिगत जलको अत्यधिक दोहन, शहरीकरणको तीव्र प्रभाव र ट्याङ्कर प्रणालीमा गुणस्तर तथा मूल्यको असमानता जस्ता समस्याहरू समाधान गर्नु अझै ठूलो चुनौती हो।”
विशिष्ट उपस्थितिहरूको सहभागिता
कार्यक्रममा खानेपानी मन्त्रालयकी सचिव ई. प्रमिलादेवी शाक्य बज्राचार्य, सहसचिव ई. मीना श्रेष्ठ, काठमाडौँ उपत्यका खानेपानी लिमिटेडका प्रमुख अशोककुमार पौडेल, खानेपानी संस्थानका महाप्रवन्धक अर्जुनबाबु ढकाल, आयोजना कार्यान्वयन निर्देशनालयका प्रमुख टिकाबहादुर चौधरीलगायत विशिष्ट व्यक्तिहरूको उपस्थिति रहेको थियो।
उपत्यकाको २०५० सम्मको गुरुयोजनाले खानेपानी सेवा वितरणको दीर्घकालीन स्पष्ट मार्गचित्र तय गरिसकेको बोर्डले जनाएको छ।
