काठमाडौं — बेरोजगार युवायुवतीलाई विदेशमा आकर्षक रोजगारी दिलाइदिन्छु भन्ने प्रलोभनमा पारेर ठगी गर्ने दुई व्यक्तिलाई काठमाडौं उपत्यकाको विभिन्न स्थानबाट प्रहरीले पक्राउ गरेको छ। काठमाण्डौं उपत्यका अपराध अनुसन्धान कार्यालय, टेकुबाट खटिएको टोलीले अनुसन्धानको क्रममा उनीहरूलाई नियन्त्रणमा लिई वैदेशिक रोजगार विभाग, ताहाचलमा बुझाएको हो।
प्रहरीका अनुसार आरोपीहरूले पीडितहरूलाई चर्को तलबको आश्वासन दिएर लामो समयसम्म झुक्याउँदै विदेश नपठाई सम्पर्कविहीन भएका थिए। पीडितले दिएको जाहेरीको आधारमा अनुसन्धान गर्दा ठगीमा संलग्न व्यक्ति फेला परेका हुन्।
पक्राउ परेका व्यक्ति:
१. जंग बहादुर तामाङ (३१ वर्ष)
२. बिकाश रायमाझी (२३ वर्ष)
यस घटनामा संलग्न अन्य व्यक्तिहरूको बारेमा थप अनुसन्धान भइरहेको काठमाण्डौं उपत्यका अपराध अनुसन्धान कार्यालयले जनाएको छ।
