काठमाडौं । चलचित्र ‘जनै हराएको बाहुन’को शुभमुहूर्त गरिएको छ। काठमाडौंको बूढानीलकण्ठमा आज बिहान चलचित्रको शुभमुहूर्त गरिएको हो।
शुभमुहूर्तमा चलचित्रका अधिकांश कलाकारको उपस्थिति रहेको थियो। बूढानीलकण्ठ मन्दिर परिसरभित्र भएको शुभमुहूर्तमा अभिनेत्री मिरुना मगर, अभिनेता सुशांक मैनाली, कलाकार गौरव पहाडी र भोलाराज सापकोटाले मुहूर्त सट दिए।
भोलिदेखि चलचित्रको छायांकन सुरु हुने निर्माण पक्षले जनाएको छ। यसअघि यो चलचित्रको स्क्रिप्ट पूजा पनि गरिएको थियो।
‘जनै हराएको बाहुन’लाई हिमाल न्यौपानेले निर्देशन गर्दै छन्। ‘जनै हराएको बाहुन’मा विजय बराल, सुशांक मैनाली, केकी अधिकारी, मिरुना मगर, गौरव पहाडी, रियर राई, भोलाराज सापकोटालगायत कलाकारको अभिनय रहनेछ।
निर्माण टिमका अनुसार भोलि काभ्रेपलाञ्चोकको पनौतीबाट चलचित्रको छायांकन सुरु हुनेछ। पाल्पा र काठमाडौंमा पनि छायांकन हुनेछ।
‘जनै हराएको बाहुन’ले गाउँबाट सहर आएका एक सरल व्यक्तिले भोग्नुपरेका अनपेक्षित घटना र त्यसले उनको जीवनमा ल्याएको परिवर्तनको कथा भन्नेछ। चलचित्रले आमा र छोराबीचको भावनात्मक कथा प्रस्तुत गर्नेछ।
शुभमुहूर्तपछि मिडियासँग संक्षिप्त कुरा गर्दै अभिनेत्री मिरुनाले भनिन्, “यो टिममा आबद्ध हुन पाउँदा म एकदमै खुसी छु, सम्पूर्ण टिमलाई धन्यवाद भन्न चाहन्छु। यसमा मेरो क्यारेक्टर मेरो लागि विशेष छ।”
एसोसिएट निर्देशक राउतले ‘जनै हराएको बाहुन’मा हामी सबै नेपालीको कथा रहेको बताए। “यसमा हाम्रो सम्बन्धको कथा छ, दाजुभाइबीचको सम्बन्धका बारेमा छ, आमा र छोराको बारेमा छ,” उनले भने।
यस्तै, अभिनेता मैनालीले चलचित्र ‘टलकजंग भर्सेस टुल्के’ रिलिज भएको १० वर्षपछि आफू सिनेमामा देखिन लागेको बताउँदै यो टिममा आबद्ध हुन पाउँदा एकदमै खुसी लागेको बताए।
निर्देशक न्यौपानेको यो डेब्यू निर्देशन हो। यो चलचित्रको एसोसिएट निर्देशकमा ‘प्रेमगीत ३’ अभिनेता मनिष राउत छन्।
बलियो लाइनअप रहेको चलचित्रको कथा, पटकथा र संवाद भानुभक्त ढकालले लेखेका छन्। पेपरक्लिप प्रालिको निर्माण रहने चलचित्रका विमल न्यौपाने निर्माता हुन्।
चलचित्रका कार्यकारी निर्मातामा कमल न्यौपाने, नारायण तिम्सिना, चुरामणी शिवाकोटी, रुपेश लामा र आरके मानन्धर रहेका छन्।
थानेश्वर गौतम र एस डी योगीको संगीत रहने यस सिनेमामा लक्ष्मणराज पौडेल प्रोडक्सन म्यानेजर रहेका छन्।
चलचित्रको छायांकन सेड्युल ४० दिनको रहेको छ। यस सिनेमाका निर्माता आदित्य फिल्म्स रहेका छन् भने नवीन गुरुङले छायांकन गर्नेछन्।
