काठमाडौँ – तलब नपाएको विरोधमा त्रिभुवन अन्तर्राष्ट्रिय विमानस्थलका सरसफाईकर्मी कर्मचारीहरू आन्दोलनमा उत्रिएका छन्, जसका कारण विमानस्थलको आन्तरिक (डोमेस्टिक) क्षेत्र फोहरले थुप्रिँदै गएको छ।
दश दिनदेखि निरन्तर आन्दोलनमा रहेका सरसफाईकर्मीहरूले काम रोक्दा विमानस्थल परिसर दुर्गन्धित बन्न पुगेको यात्रुहरूले गुनासो गरेका छन्।
फोहर र दुर्गन्धले यात्रु हैरान
विमानस्थलमा भेटिएका यात्रु हरिष क्षेत्रीले वातावरण अत्यन्तै असहज भएको बताउँदै भने, “जहाँतहीँ फोहरको थुप्रो छ, दुर्गन्ध सहनै गाह्रो छ। कर्मचारीहरूले कालो ब्यानर टाँगेर आन्दोलन गरिरहेका छन्। काम गरेको पारिश्रमिक त दिनै पर्छ नि!”
अन्य यात्रुहरूले पनि विमानस्थल प्रशासनको लापरबाहीले अन्तर्राष्ट्रिय गेटवेको छवि बिग्रेको बताएका छन्।
तलब निकासामा ढिलाइको कारण के?
यसबारे त्रिभुवन अन्तर्राष्ट्रिय विमानस्थलका महाप्रबन्धक जगन्नाथ निरौलाले तलबका लागि नेपाल नागरिक उड्डयन प्राधिकरणको सञ्चालक समितिमा पत्राचार गरिए पनि निर्णय नभएका कारण तलब दिन नसकिएको बताए।
“तलब निकासा गर्न पत्राचार भइसकेको छ, तर सञ्चालक समितिबाट स्वीकृति नआएकाले समस्या उत्पन्न भएको हो,” उनले भने।
सरसफाईकर्मीहरू आन्दोलित रहेसम्म विमानस्थलमा सरसफाईको अवस्था झन् बिग्रन सक्ने देखिएको छ। यात्रुहरूलाई सुविधा दिन सम्बन्धित निकायले चाँडो पहल नगरे, स्थिति थप जटिल बन्ने सम्भावना छ।
