चितवन, नेपाल – अन्तर्राष्ट्रिय पशु अधिकार संस्था पेटाले चितवन हात्ती महोत्सवमा हात्तीहरूको अमानवीय शोषण रोक्न आग्रह गर्दै गृहमन्त्री रमेश लेखकलाई औपचारिक पत्राचार गरेको छ।
पेटाले उक्त पत्रमा हात्तीलाई पिटेर फोटो खिच्न लगाउने, पर्यटकहरूको सवारीका लागि जबर्जस्ती प्रयोग गर्ने, तथा भीडभाडपूर्ण वातावरणमा फुटबल खेल्न बाध्य पार्ने जस्ता गतिविधिहरू न केवल क्रूरता हुन्, तर मानव सुरक्षाका दृष्टिकोणबाट पनि अत्यन्तै जोखिमपूर्ण रहेको जनाएको छ।
पेटाले अघिल्ला वर्षहरूमा अन्य देशहरूमा भएका दुर्घटनाहरूको उदाहरण दिँदै नेपालमा पनि यस्ता घटनाहरू हुन सक्ने चेतावनी दिएको छ। उदाहरणका लागि, थाइल्याण्डमा हात्तीसम्बन्धी गतिविधिमा संलग्न हुँदा एक स्पेनी पर्यटकको मृत्यु भएको थियो, भने भारतको केरला राज्यमा मात्र १० दिनको अवधिमा ९ हात्तीले ५ जनाको ज्यान लिएका थिए।
“चितवन हात्ती महोत्सवमा वन हात्ती र बन्दी हात्तीको उपस्थितिले तनाव सिर्जना गर्ने जोखिम रहन्छ। यदि कुनै बेला हात्तीहरूले आक्रामक रूप लिए भने तिनीहरूलाई रोक्ने कुनै उपाय हुँदैन, जसले मानव हताहत निम्त्याउन सक्छ,” पेटाका वरिष्ठ उपाध्यक्ष जेसन बेकरले भने।
हात्तीमाथिको दुर्व्यवहारको खुलासा
२०२४ को चितवन हात्ती महोत्सवमा हात्तीमाथि माहुतेहरूले फलामको अंकुश, लठ्ठी र चुच्चो काठका चक्कु जस्ता हतियार प्रयोग गरी बारम्बार पिट्ने र घोच्ने गरेको पेटाले सार्वजनिक गरेको थियो।
“हात्तीलाई जबर्जस्ती प्रतियोगितामा सहभागी गराउनु क्रूरताको पराकाष्ठा हो। एउटा हात्तीलाई ‘पेनाल्टी किक’ को अभ्यासका क्रममा पाँच मिनेटमै ६४ पटक घोचिएको थियो,” पेटाले आरोप लगाएको छ।
हात्तीहरूलाई महोत्सव बाहिर पनि पर्यटक सवारीका लागि जबर्जस्ती प्रयोग गरिने उल्लेख गर्दै पेटाले नेपाल सरकारलाई हात्ती शोषण अन्त्यका लागि ठोस कदम चाल्न आग्रह गरेको छ।
“जनावर मनोरञ्जनका साधन होइनन्”
पेटा एशियाले प्रजातिवाद र मानिसलाई अन्य प्रजातिभन्दा श्रेष्ठ ठान्ने दृष्टिकोणको विरोध गर्दै आएको छ।
पेटाले नेपाल सरकारलाई दुर्घटनाहरू हुन नदिन र हात्तीमाथिको अन्याय रोक्न तुरुन्तै हस्तक्षेप गर्न आग्रह गरेको छ।
थप जानकारीका लागि:
सम्पर्क: किथ गुओ, +८५२ ६०४८ ५८०२
