एनआरएनए बेल्जियमद्वारा सदस्यता नवीकरण र नयाँ सदस्यताका लागि आग्रह — OSNepal

एनआरएनए बेल्जियमद्वारा सदस्यता नवीकरण र नयाँ सदस्यताका लागि आग्रह

Kesh Karki (USA) April 03, 2025 0

ब्रसेल्स, बेल्जियम – गैरआवासीय नेपाली संघ (एनआरएनए) राष्ट्रिय समन्वय परिषद् (एनसिसी) बेल्जियमले उच्चस्तरीय समितिको वेबसाइटमार्फत सदस्यता लिन आह्वान गरेको छ।

एनसिसी बेल्जियमकी अध्यक्ष सीता सापकोटाले अप्रिल ७, २०२५ भित्र सदस्यता लिएर डेलिगेट्स बन्न आग्रह गर्दै सबै बेल्जियम निवासी एनआरएनहरूलाई यस प्रक्रियामा सहभागी हुन अनुरोध गरिन्।

गत मार्च १६, २०२५ मा बसेको एनआरएनए एनसिसी बेल्जियमको पूर्ण बैठकले सर्वोच्च अदालतको परमादेश तथा परराष्ट्र मन्त्रालयको पछिल्लो निर्देशनलाई आत्मसात् गर्दै आफ्नै व्यवस्थापनमा सदस्यता वितरण गर्ने निर्णय लिएको थियो। तर, हाललाई उच्चस्तरीय समितिको वेबसाइटमार्फत सदस्यता लिन आग्रह गरिएको अध्यक्ष सापकोटाले बताइन्।

सदस्यता नवीकरण गर्न अपिल

यसैबीच, एनआरएनए अभियन्ता लोक दाहालले हालको एनसिसी सदस्यताको अवधि ३० मार्च २०२५ मा समाप्त भइसकेको जानकारी गराउँदै, संस्थाको निरन्तरता सुनिश्चित गर्न सबै पक्षहरूबिच सहकार्य आवश्यक रहेको उल्लेख गरे।

दाहालका अनुसार, सर्वोच्च अदालतको परमादेशलाई ध्यानमा राख्दै उच्चस्तरीय समितिसँग समन्वय गरी एकता महाधिवेशनलाई सकारात्मक रूपमा अघि बढाउनुपर्ने आवश्यकता छ।

“उच्चस्तरीय समितिको पोर्टलमार्फत ७ अप्रिल २०२५ भित्र सदस्यता नवीकरणको अवसर प्रदान गरिएको छ। संस्थाको स्थायित्वका लागि सबै एनआरएन साथीहरूले समयमै सदस्यता नवीकरण गर्नुहुन अनुरोध गर्दछु। साथै, सामाजिक सञ्जालमा विभिन्न भ्रामक सूचना फैलिइरहेको देखिएकोले, कुनै पनि भ्रममा नपर्नुहोला,” दाहालले भने।

एनआरएनए बेल्जियमले सबै नेपाली समुदायलाई निर्धारित समयभित्र सदस्यता प्रक्रियामा सहभागी भई संस्थाको गतिविधिलाई थप सशक्त बनाउन अनुरोध गरेको छ।

Leave a Reply

Your email address will not be published. Required fields are marked *

भर्खर