काठमाडौं – जनता समाजवादी पार्टी (जसपा) नेपालले सङ्घीय लोकतान्त्रिक मोर्चा गठनको अवधारणालाई अनुमोदन गरेको छ। बुधबार पार्टी अध्यक्ष उपेन्द्र यादवको अध्यक्षतामा बसेको केन्द्रीय सचिवालय बैठकले सात दलीय मोर्चा गठन गर्ने सहमतिलाई स्वीकृति दिने निर्णय गरेको हो।
पार्टीका प्रचार प्रसार तथा प्रकाशन विभाग प्रमुख पूर्ण बस्नेतका अनुसार बैठकले स्थानीय तहको अधिवेशन निर्धारित समयमै सम्पन्न गर्न विशेष ध्यान दिने निर्णय समेत गरेको छ। साथै, भ्रातृसङ्गठनका अधिवेशन तथा महाधिवेशनलाई आवश्यक सहयोग र समन्वयमा सफल बनाउन मातहतका समितिलाई निर्देशन दिइएको छ।
जसपाले समानताका लागि सङ्घर्ष गर्न परिसंघ गठन गर्ने उद्देश्यसहित यही चैत्र ३० गते पार्टी केन्द्रीय कार्यालयमा विशेष बैठकको आयोजना गर्ने निर्णय गरेको छ। त्यस्तै, सर्लाही जिल्लामा पार्टीभित्र देखिएका समस्या समाधान तथा गतिरोध अन्त्य गर्न केन्द्रीय उपाध्यक्ष मृगेन्द्र कुमार सिंह यादवलाई विशेष जिम्मेवारी दिइएको बस्नेतले जानकारी दिए।
