काठमाडौं – चैत्र १५ गते तिनकुनेमा भएको प्रदर्शनका क्रममा कोटेश्वर क्याम्पसकी विद्यार्थी रेविका खत्री र उनका दाजु दिनेश कुमारमाथि प्रहरीले गोली प्रहार गरी गम्भीर घाइते बनाएको घटनाले देशभर आक्रोश फैलिएको छ।
राष्ट्रिय प्रजातान्त्रिक विद्यार्थी संगठन (राप्रविसं) ले घटनाको कडा निन्दा गर्दै दोषीमाथि तत्काल कारबाहीको माग गरेको छ। संगठनका केन्द्रीय सदस्य यमन भुर्तेलले सरकारसँग तत्काल जवाफ माग्दै प्रहरी प्रशासनको लापरवाहीप्रति गम्भीर आपत्ति जनाएका छन्।
यमन भुर्तेलका पाँच गम्भीर प्रश्न सरकारलाई
राप्रविसंका केन्द्रीय सदस्य यमन भुर्तेलले सरकारलाई गम्भीर प्रश्न गर्दै भने:
1. “अब नागरिकले सुरक्षित रूपमा बाटो हिँड्न पनि नपाउने हो?”
2. “सरकारले निर्दोष विद्यार्थी र उनका परिवारमाथि गोली प्रहार गर्नुको कारण के हो?”
3. “विद्यार्थीहरूले आफ्नो ज्यानको सुरक्षाको प्रत्याभूति कसरी पाउने?”
4. “म्याद सकिएको अश्रुग्यास प्रयोग गरेर सरकारले आफ्नै नागरिकको स्वास्थ्य जोखिममा पार्नुको जिम्मेवारी को लिन्छ?”
5. “प्रहरी प्रशासनको चरम लापरवाहीमा सरकारको भूमिका के हो?”
“यो प्रहरी प्रशासनको चरम लापरवाही हो” – यमन भुर्तेल
यमन भुर्तेलका अनुसार रेविका र उनका दाजु दिनेश कुमार कुनै प्रदर्शनमा संलग्न थिएनन्, न कुनै अवैधानिक गतिविधिमा।
तर, प्रहरी प्रशासनको लापरवाहीका कारण निर्दोष नागरिकमाथि गोली प्रहार गरिएको छ। उनले भने,
“बिना कुनै अनुसन्धान वा सावधानी, प्रहरीले गोली चलाउनु गैरजिम्मेवारीपनको पराकाष्ठा हो। यदि प्रहरी यसरी अन्धाधुन्ध गोली चलाउनेछ भने, हरेक नागरिक असुरक्षित हुन सक्छ।”
सरकारलाई चेतावनी: “पीडित परिवारलाई क्षतिपूर्ति दिनुपर्छ”
भुर्तेलले सरकारलाई चेतावनी दिँदै भने,
“नागरिकको सुरक्षाको प्रत्याभूति दिनुपर्ने प्रहरी नै असावधानीपूर्वक गोली चलाउँछ भने, सरकारको दायित्व के हो?
यो घटनाको सम्पूर्ण जिम्मेवारी सरकारले लिनुपर्छ र पीडित परिवारलाई उचित क्षतिपूर्ति दिनुपर्छ।”
राप्रविसंको आन्दोलनको चेतावनी
राप्रविसंका केन्द्रीय सदस्य यमन भुर्तेलले चेतावनी दिँदै भने,
“यदि गृह प्रशासनले घटनाको जिम्मेवारी लिएन भने, राष्ट्रिय प्रजातान्त्रिक विद्यार्थी संगठन सडक आन्दोलन गर्न बाध्य हुनेछ।”
विद्यार्थी समुदायको सुरक्षालाई उपेक्षा गर्ने सरकारविरुद्ध कडा संघर्ष गर्ने प्रतिबद्धता व्यक्त गर्दै, संगठनले सम्पूर्ण विद्यार्थीलाई अन्यायको विरोधमा एकजुट हुन आह्वान गरेको छ।
भुर्तेलले थपे,
“हामी यो घटनालाई सामान्य रूपमा लिन सक्दैनौं। यदि आज हामी चुप बस्यौं भने भोलि अरू पनि प्रहरीको दमनको सिकार बन्न सक्छन्। न्याय नपाएसम्म हामी संघर्ष जारी राख्नेछौं।”
संगठनले चैत १९ गते प्रेस विज्ञप्ति जारी गर्दै घटनाको निष्पक्ष छानबिन र न्यायको माग गरेको छ।
झुक्किएर गोली लागेको भनेर प्रहरी पन्छिन मिल्दैन
नेपाल प्रहरी क्लब भृकुटीमण्डपमा आयोजित पत्रकार सम्मेलनमा केन्द्रीय प्रहरी प्रवक्ता डीआईजी दिनेश आचार्यले भने, “भाटभटेनी सुपरस्टोरमा भएको लुटपाट नियन्त्रणमा लिने क्रममा बल प्रयोग गर्दा त्यसको असर रेविका र उनका दाजुमाथि परेको हो। उहाँहरूलाई झुक्किएर गोली लागेको हुन सक्छ।”
तर, राप्रविसंका केन्द्रीय सदस्य यमन भुर्तेलले प्रहरीको यो स्पष्टीकरणलाई अस्वीकार गर्दै भने, “झुक्किएर गोली लागेको भनेर प्रहरी पन्छिन मिल्दैन। जब भाटभटेनीका सुरक्षा गार्डले एक्लै लुटपाट गर्ने व्यक्तिलाई समातेर कुटेका थिए, प्रहरी के गर्दै थियो? एउटा सुरक्षा गार्डले लुटेरा नियन्त्रण गर्न सक्छ भने, प्रहरी किन असफल भयो? गोली नै चलाउनुको कारण के थियो? के हाम्रा देशका प्रहरी भाटभटेनीका सुरक्षा गार्डभन्दा कमजोर भएका हुन्?”
