काठमाडौँ – नेपाल संगीत तथा नाट्य प्रज्ञा प्रतिष्ठानले आयोजना गरेको सप्ताहव्यापी नृत्यक्षर विज्ञान प्रशिक्षण सफलतापूर्वक सम्पन्न भएको छ। गत मंगलबारबाट सुरु भई यो मंगलबारसम्म चलेको प्रशिक्षणमा ४० जना नृत्यकारले नृत्य सम्बन्धी व्याकरणीय कला सिकेका छन्।
नेपाल संगीत तथा नाट्य प्रज्ञा प्रतिष्ठानको नृत्य विभागद्वारा आयोजित यो प्रशिक्षण सैद्धान्तिक तथा प्रयोगात्मक रूपमा सञ्चालन गरिएको थियो। प्रतिष्ठानको सभाकक्षमा नियमित रूपमा ४० जना नृत्यकारले यो प्रशिक्षण लिएका थिए।
प्रशिक्षण समापन समारोहमा नेपालका प्रथम नृत्य निर्देशक भैरवबहादुर थापा, प्रतिष्ठानका उपकुलपति शम्भु राई, सदस्य सचिव प्रगती महरा, नृत्य विभाग प्रमुख सुवर्ण हमाललगायतले प्रशिक्षार्थीहरूलाई प्रमाणपत्र प्रदान गरे।
शास्त्रीय ज्ञान अभाव हटाउने अवसर
प्रशिक्षार्थीहरूका अनुसार यसअघि विभिन्न कार्यक्रममा नृत्य प्रस्तुत गरे पनि शास्त्रीय तथा सैद्धान्तिक ज्ञानको अभाव महसुस हुँदै आएको थियो। दैनिक ६ घण्टाको दरले ४९ घण्टाको प्रशिक्षण दिइएको थियो, जसले उनीहरूलाई व्यावहारिक ज्ञानसँगै नृत्यको शास्त्रीय पक्ष पनि बुझ्ने अवसर दियो।
समापन समारोहमा प्रमुख अतिथि भैरवबहादुर थापाले यो प्रशिक्षणले नृत्य कलाकारको व्यवहारिकसँगै सैद्धान्तिक ज्ञान वृद्धि गरेको बताए। प्रतिष्ठानका उपकुलपति शम्भु राईका अनुसार नेपालमा पहिलो पटक नृत्यक्षरमा आधारित प्रशिक्षण दिइएको हो।
राष्ट्रिय सभा सदस्य जगप्रसाद शर्माले प्रशिक्षण जीवनभर उपयोगी हुने बताउँदै, सिकेका कुरा अभ्यासमा उतार्न विद्यार्थीहरूलाई सुझाव दिए। सदस्य सचिव प्रगती महराका अनुसार यो प्रशिक्षण अघिल्ला प्रशिक्षणभन्दा फरक र थप उपयोगी रहेको छ।
नृत्य विभाग प्रमुख सुवर्ण हमालले नृत्य व्याकरणबारे धेरै कलाकार अनभिज्ञ रहेको समयमा यस्तो प्रशिक्षण आवश्यक भएको बताए। नृत्य निर्देशक कृष्ण प्रसाद पौडेल र अनमी बोहराले प्रशिक्षण दिएका थिए।
प्रशिक्षार्थीहरूले नृत्यक्षण अर्थात् नृत्यको सैद्धान्तिक ज्ञान, भाव, मुद्रासम्बन्धी अभ्यास गरेका थिए। समापन समारोहमा निर्मला नेपाल र दीपेश माझीले अनुभव साझा गर्दै, नृत्य क्षर प्रशिक्षणले नृत्यलाई अझ राम्ररी बुझ्ने अवसर दिएको बताए।
समापन कार्यक्रममा प्रशिक्षार्थीहरूले आफूहरूले सिकेका भावहरू समेटेर नृत्य प्रदर्शन गरेका थिए। सप्ताहव्यापी प्रशिक्षणबाट नृत्य कलामा रुचि राख्ने नयाँ तथा अनुभवी नृत्यकारहरूलाई महत्वपूर्ण योगदान पुगेको आयोजकहरूले बताएका छन्।
