काठमाडौं – चलचित्र ‘लाज शरणम्’ छैटौं हप्तामा प्रवेश गरेको छ। शिवरात्रिको अवसरमा फागुन १४ गते रिलिज भएको यस चलचित्रले छैटौं हप्तामा पनि प्रदर्शनको यात्रा जारी राख्दै सफलता प्राप्त गरेको हो।
प्रदर्शनको पहिलो दिनमै उल्लेखनीय कमाइ गर्दै, चलचित्रले राम्रो प्रतिक्रिया प्राप्त गरेको निर्माण टिमले जनाएको छ। ‘लाज शरणम्’ उच्च शो सहित प्रदर्शनमा आएको थियो र अहिले पनि यसको शोहरूमा दर्शकको उपस्थिति उत्साहजनक रहेको छ। चलचित्रको व्यापारिक यात्रा अझै केही समय कायम रहने अपेक्षा गरिएको छ।
निर्माता नवीन श्रेष्ठले भने, “चलचित्र ‘लाज शरणम्’ सफलतासहित छैटौं हप्तामा प्रवेश गरेको छ। दर्शकको राम्रो प्रतिक्रिया र राम्रो व्यापार गर्दै यो चलचित्र तेस्रो हप्तामा प्रवेश गरेको हो। अहिले पनि चलचित्रलाई उपलब्ध शोमा दर्शकको संख्या उच्च छ।”
चलचित्रले पहिलो दिन १ करोड १० लाख रुपैयाँ ग्रसकलेक्सन गरेको थियो, तर त्यसपछिको व्यापारिक आँकडा निर्माताले सार्वजनिक गरेका छैनन्।
‘लाज शरणम्’लाई कुमार कट्टेल (जिग्री)ले निर्देशन गरेका छन्। यस चलचित्रको निर्माण जेपिटी क्रियसनको ब्यानरमा भएको हो र नवीन श्रेष्ठ निर्माता छन्। राम नरेश शाह र सृजना खड्का सह–निर्माताका रूपमा रहेका छन्।
चलचित्रमा सीताराम कट्टेल, विजय बराल, अर्पण थापा, महेश त्रिपाठी, मुकुन्द श्रेष्ठ, विजय लामा, रेणुनाथ योगी, सागर लम्साल, हरी निरौला, अर्जुन घिमिरे, कमलमणि नेपाल, प्रियाना आचार्य, दयाहाङ राई र बुद्धि तामाङ लगायतका कलाकारहरूको अभिनय छ।
