काठमाडौं – जनता समाजवादी पार्टी (जसपा) नेपालनिकट प्रेस मञ्च, नेपालको जिल्ला अधिवेशनबाट नयाँ नेतृत्व निर्वाचित भएको छ। बारा, पर्सा र रौतहटमा आयोजित अधिवेशनबाट नयाँ कार्य समिति चयन गरिएको जानकारी प्रेस मञ्च, नेपालका महासचिव अबधेश झाले दिएका छन्।
नयाँ कार्य समिति अनुसार, पर्सामा रामजी यादव, बारामा मेघराज पासमान (निखिल) र रौतहटमा किशोरी यादवलाई अध्यक्ष चयन गरिएको छ।
अधिवेशनको आगामी कार्यतालिका
प्रेस मञ्च, नेपालले मधेस प्रदेशअन्तर्गतका जिल्लामा आगामी अधिवेशनको कार्यतालिका सार्वजनिक गरेको छ। जसअनुसार, सिरहा जिल्लाको अधिवेशन चैत्र २० गते, सप्तरीको २१ गते, महोत्तरीको २२ गते, धनुषाको २३ गते र सर्लाहीको २४ गते हुने भएको छ।
केन्द्रीय समितिको अधिवेशन
अन्य प्रदेशअन्तर्गतका जिल्लाहरुको अधिवेशन सम्पन्न भएपछि प्रेस मञ्च, नेपालले केन्द्रीय समितिको अधिवेशन गर्ने तयारी गरेको महासचिव झाले जानकारी दिए।
जसपा नेपालको निर्देशन
जसपा नेपालले पार्टीको भ्रातृसंगठनहरूको बैशाख मसान्तसम्म अधिवेशन सम्पन्न गर्नका लागि सर्कुलर जारी गरेको छ।
