काठमाडौं – निर्माता दीपक लम्सालको लगानीमा नयाँ नेपाली सिनेमा ‘हे माया’ निर्माण हुने भएको छ। सिनेमाको छायांकन आगामी जेठबाट सुरु गर्ने तयारीसहित निर्माण घोषणा गरिएको छ।
निर्माता लम्सालका अनुसार सिनेमामा चर्चित कलाकारहरूको अभिनय रहनेछ। हालसम्म धेरै कलाकारसँग मौखिक सहमति भए पनि लिखित सम्झौता बाँकी रहेकोले केही समयपछि कलाकारहरूको नाम सार्वजनिक गरिनेछ।
बलिउड वितरणबाट नेपाली सिनेमामा प्रवेश
दीपक लम्साल लामो समयदेखि भारतको मुम्बईमा बसेर बलिउड तथा दक्षिण भारतीय सिनेमाको नेपाल रिलिज व्यवस्थापन गर्दै आएका छन्। बलिउड सिनेमा वितरणमा लामो समय काम गरिसकेपछि उनले पहिलो पटक नेपाली सिनेमा निर्माणमा हात हाल्न लागेका हुन्।
जुनिम गहतराजको निर्देशन
रियल इन्टरटेनमेन्ट प्रालीको ब्यानरमा बन्ने सिनेमालाई निर्देशक जुनिम गहतराजले निर्देशन गर्नेछन्। हालै प्रदर्शनमा आएको उनको सिनेमा ‘ताण्डवम्’ बाट प्रभावित भएर नै लम्सालले उनलाई निर्देशनको जिम्मेवारी दिएको बताएका छन्।
पटकथा तथा कलाकार छानोट
सिनेमाको पटकथा तथा संवाद चक्रपाणी सांखीले लेखिरहेका छन्। नेपाली नयाँ वर्षको सुरुवातसँगै सिनेमाको कास्ट एन्ड क्रिउ सार्वजनिक गर्ने तयारी गरिएको छ।
निर्माण टिमका अनुसार सिनेमा भव्य रूपमा निर्माण गरिनेछ र दर्शकलाई नयाँ स्वाद दिने प्रयास गरिनेछ।
