सहकारी दिवसको अवसरमा पामे बजार सरसफाइ अभियान — OSNepal

सहकारी दिवसको अवसरमा पामे बजार सरसफाइ अभियान

Kesh Karki (USA) April 02, 2025 0

पोखरा – ६८ औं राष्ट्रिय सहकारी दिवसको अवसरमा पामे बचत तथा ऋण सहकारी संस्था ले पामे बजारमा सरसफाइ कार्यक्रम सम्पन्न गरेको छ। पोखरा–२४ स्थित पामे बजारमा सहकारीका सदस्यहरू, स्थानीय बासिन्दा, प्रहरी, तथा विभिन्न आमा समूहको सहकार्यमा सरसफाइ गरिएको हो।

यस अभियानमा फेवा क्लब पामे, फेवा आमा समूह पामे, सिर्जनशील आमा समूह पामे, र प्रहरी चौकी पामे लगायत विभिन्न संघसंस्थाहरूको सक्रिय सहभागिता रहेको थियो। “मर्यादित सहकारी, समुन्नत समाज” भन्ने मूल नाराका साथ यस वर्ष ६८ औं राष्ट्रिय सहकारी दिवस मनाइँदै छ।

पामे बचत तथा ऋण सहकारीका अध्यक्ष नवराज पराजुली ले फेवातालको मुहान क्षेत्र तथा पर्यटकीय स्थल भएकाले बजार सफा राख्न सरसफाइ अभियान चलाइएको जानकारी दिए। उनले सहकारीले सामाजिक क्षेत्रमा समेत विभिन्न गतिविधि सञ्चालन गर्दै आएको उल्लेख गरे।

सहकारीका व्यवस्थापक सूर्यमोहन पराजुली का अनुसार बजारमा प्लास्टिक, बोतल तथा अन्य फोहोर बढी भेटिएको छ। उनले बजार सफा राख्नुपर्ने र विशेष गरी फेवाताल प्रदूषण हुन नदिन सचेत हुनुपर्ने बताए।

हाल पामे बचत तथा ऋण सहकारी संस्थामा १,०१० जना सेयर सदस्य छन्। संस्थाको अधिकृत पुँजी १५ करोड रुपैयाँ तथा चुक्ता पुँजी १० करोड १० लाख रुपैयाँ रहेको छ। आर्थिक वर्ष २०८०/८१ मा १७ करोड ९ लाख ७८ हजार रुपैयाँ निक्षेप संकलन गरी २५ करोड ४ लाख १६ हजार रुपैयाँ कर्जा प्रवाह गरिएको सहकारीले जनाएको छ।

Leave a Reply

Your email address will not be published. Required fields are marked *

भर्खर