शिक्षा क्षेत्रको सुधारका लागि काम गर्दै आएको युडब्ल्यूएस नेपाल ले ‘शून्य शैक्षिक गरिबी’ को पहल सुरु गरेको छ।
सोमबार ललितपुरमा आयोजित एक कार्यक्रमका बीच युडब्ल्यूएस नेपाल ले “शून्य शैक्षिक गरिबी” परियोजना सुरु गरेको घोषणा गरेको हो। त्यस्तै, युडब्ल्यूएस नेपाल ले “युके एड म्याच चौथो चरणः सिकाइदेखि कार्यान्वयनसम्म” को समापन भएको जनाएको छ।
विगत तीन वर्षमा, युके एड म्याच चौथो चरण परियोजनाले गरिबी, लैङ्गिक असमानता, भौगोलिक विकटता र अपर्याप्त विद्यालय पूर्वाधार समस्यालाई समाधान गर्दै ८ हजार ५ सय ५ बालबालिका प्रत्यक्ष रूपमा लाभान्वित गरेको युडब्ल्यूएस नेपालका निर्देशक सूर्य कार्की ले जानकारी दिनुभयो।
यस पहलले विद्यालय पूर्वाधारलाई सुदृढ बनाउँदै, शिक्षण क्षमता बढाएको र सुधारलाई दिगो बनाउन स्थानीय सरकारहरूसँग दीर्घकालीन साझेदारीलाई सशक्त बनाएको उहाँले बताउनुभयो। निर्देशक कार्कीले शैक्षिक परिवर्तन भवन निर्माणका रूपमा मात्र देखिएको तर त्यसका कारण वास्तविक शिक्षा क्षेत्रमा परिवर्तन हुन नसकेको उल्लेख गर्नुभयो।
कार्यक्रममा स्थानीय शिक्षामा उत्कृष्ट अभ्यास, चुनौती र दिगो समाधानका बारेमा सामूहिक छलफल गरिएको थियो। युडब्ल्यूएस नेपाल ले हालसम्म २९ नगरपालिकाका ३२१ दुर्गम समुदायमा शैक्षिक रूपान्तरण गर्दै १०७ विद्यालयमार्फत २०,६९० विद्यार्थीहरूसम्म पहुँच पुर्याइएको जनाएको छ।
