काठमाडौं । गायक सुशान्त केसी को स्वर रहेको चलचित्र ‘कर्मा’ को गीत ‘पागल’ सार्वजनिक भएको २४ घण्टामा नै युट्युबको म्युजिक ट्रेन्डिङमा पुगेको छ।
सोमबार सुशान्त केसीको युट्युब च्यानल बाट सार्वजनिक प्रेमिल गीतमा शब्द, संगीत र लय स्वयं गायक केसीकै रहेको छ। गीतलाई दर्शकले सकारात्मक प्रतिक्रिया दिइरहेका छन्, जसको प्रमाण छोटो समयमा ५ लाख भन्दा बढी भ्युज हो।
गीतको भिडियोमा चलचित्रका मुख्य कलाकार विपीन कार्की र उपासना सिंह ठकुरी फिचर्ड छन्। विपीनले उपासनालाई देख्नासाथ प्रेममा परेको दृश्यलाई गीतले जीवन्त बनाएको छ।
‘कर्मा’ चैत २९ गते रिलिज हुँदै
नेपाल र विदेशमा एकसाथ प्रदर्शन हुने ‘कर्मा’ आगामी चैत २९ गते रिलिज हुने भएको छ। एक्सन, ड्रामा र सस्पेन्स जनरामा निर्माण भएको फिल्ममा विपीन र उपासना का साथै मुकुन भुसाल, दिब्यदेब, सरिता गिरी, बेन बस्नेत लगायतको अभिनय छ।
सेभेन सिज सिनेमाले अन्तर्राष्ट्रिय प्रदर्शन अधिकार लिएको चलचित्रमा भाष्कर स्वर को संगीत, कविराज गहतराज को कोरियोग्राफी, श्री श्रेष्ठ को द्वन्द्व निर्देशन र निमेष श्रेष्ठ को सम्पादन रहेको छ।
निर्देशक चौधरी को ‘अगस्त्यः च्याप्टर १’ पछि आउने यो फिल्म वसन्त लम्सालको लगानीमा आर्टिस्टिक इन्टरटेनमेन्ट को प्रस्तुति हो।
