काठमाडौं, १५ चैत २०८१ – काठमाडौं महानगरपालिकाले तीनकुनेमा आयोजित कार्यक्रममा वातावरण प्रदूषण भएको भन्दै ‘श्री ज्ञानेन्द्र शाह, निर्मल निवास’ उल्लेख गरी जरिवाना पत्र पठाएपछि संयुक्त जनआन्दोलन समितिले कडा आपत्ति जनाएको छ।
संयुक्त जनआन्दोलन समितिले मंगलबार एक विज्ञप्ति जारी गर्दै सो पत्राचारले राजसंस्थासँग सम्बन्धित भ्रम र अनास्था सिर्जना गर्ने कुत्सित उद्देश्य बोकेको दाबी गरेको छ। समितिले कार्यक्रम नेपाल प्रहरी र जिल्ला प्रशासन कार्यालयको पूर्वस्वीकृतिबाट सम्पन्न भएको स्पष्ट पार्दै महानगरको निर्णयलाई दुर्भावनायुक्त भएको आरोप लगाएको छ।
समितिका कार्यवाहक संयोजक डा. जगमान गुरुङले यसअघि त्रिभुवन अन्तर्राष्ट्रिय विमानस्थलमा राजाको स्वागतका क्रममा आयोजकलाई मात्र पत्राचार गरिएको उदाहरण दिँदै यस पटक गरिएको निर्णय पक्षपाती रहेको बताएका छन्।
“महानगरपालिकाले तुरुन्तै आफ्नो निर्णय फिर्ता लिनुपर्छ। अन्यथा, हामी कानुनी र अन्य आवश्यक कदम चाल्न बाध्य हुनेछौं,” विज्ञप्तिमा चेतावनी दिइएको छ।
राष्ट्र, राष्ट्रियता, धर्म, संस्कृति तथा नागरिक अधिकारको संरक्षणका लागि आयोजित सो कार्यक्रमप्रति महानगरको यस्तो व्यवहारप्रति समिति र समर्थकहरूले गम्भीर असन्तोष व्यक्त गरेका छन्।
