काठमाडौं – पूर्वप्रधानमन्त्री लोकेन्द्र बहादुर चन्दले हालै काठमाडौंमा भएको शान्तिपूर्ण विरोधसभाका क्रममा भएका हिंसात्मक घटनाप्रति गहिरो दुःख व्यक्त गरेका छन्।
एक प्रेस वक्तव्य जारी गर्दै उनले आन्दोलनका क्रममा भएको भनिएको हत्या, आगजनी तथा लुटपाटका घटनाहरू यदि सत्य भएमा त्यसको कडा निन्दा गर्दै दोषीउपर निष्पक्ष छानबिन र कानूनी कारबाहीको माग गरेका छन्।
चन्दले सहादत प्राप्त गरेका आन्दोलनकारीप्रति श्रद्धाञ्जली अर्पण गर्दै पीडित परिवारप्रति गहिरो समवेदना प्रकट गरेका छन्। साथै, उनले पीडितहरूलाई उचित क्षतिपूर्ति उपलब्ध गराउन सरकारलाई आग्रह गरेका छन्।
उनले नवगठित राष्ट्रिय मुक्ति तथा सशक्त संघीयता पक्षधर जनआन्दोलनलाई समर्थन गर्दै गिरफ्तार वरिष्ठ नेता नवराज सुवेदीसहित हिरासतमा रहेका अन्य नेता, अभियन्ता तथा कार्यकर्ताहरूको शीघ्र रिहाइको माग गरेका छन्।
“मुख्यतः अब देशलाई निकास दिन राजनीतिक सहमति, सहकार्य र राष्ट्रिय एकता अपरिहार्य छ,” चन्दले भने। उनले सबै पक्षलाई व्यक्तिगत आग्रह-पूर्वाग्रह त्यागेर राष्ट्रहितलाई प्राथमिकता दिन आग्रह गरेका छन्।
