काठमाडौं – गत चैत्र १५ गते काठमाडौंको तिनकुने क्षेत्रमा दुर्गा प्रसाई नेतृत्वको समूहद्वारा आयोजित कार्यक्रममा तोडफोड, आगजनी, र लुटपाटका घटनाहरू घटेपछि प्रहरीले अनुसन्धान थालेको छ। घटनापछि सामाजिक सञ्जालमा विभिन्न अफवाह फैलिन थालेको भन्दै काठमाडौं प्रहरी परिसरले आधिकारिक विज्ञप्ति जारी गर्दै आम नागरिकलाई संयम रहन आग्रह गरेको छ।
प्रहरीका अनुसार, घटनाका बारेमा गहिरो छानबिन भइरहेको छ। यसै क्रममा केही व्यक्तिहरूलाई सोधपुछ गरिएको छ भने घटनाका दृश्यहरू संकलन गरिने क्रम जारी छ। प्रहरीले सामाजिक सञ्जालमा भ्रम फैलाउने सामग्री नफैलाउन आग्रह गर्दै सत्यतथ्य पुष्टि गर्न आधिकारिक स्रोतको अनुसरण गर्न अनुरोध गरेको छ।
प्रहरीको अपिल
काठमाडौं प्रहरी परिसरले तोडफोड, आगजनी, लुटपाट, र प्रहरी कारबाहीका घटनासँग सम्बन्धित कुनै पनि प्रमाण, फोटो वा भिडियो भएमा आधिकारिक माध्यमबाट उपलब्ध गराउन आग्रह गरेको छ। यसका लागि नागरिकहरूले निम्न माध्यमहरू प्रयोग गर्न सक्नेछन्:
• ईमेल: kathmandu_spokesperson@nepalpolice.gov.np
• फेसबुक पेज: Police Range Kathmandu
• सम्पर्क नम्बर: ९८५११२६९८३ (9851126983)
प्रहरीले शान्ति सुरक्षाका लागि संयमता, धैर्यता, र जिम्मेवारपूर्ण व्यवहार आवश्यक रहेको बताउँदै कुनै पनि अफवाहको पछि नलाग्न सबै पक्षलाई आग्रह गरेको छ।
