माल्टा – गैरआवासीय नेपाली संघ (एनआरएनए) को १६औं युरोपेली क्षेत्रीय सम्मेलन माल्टामा भव्य रूपमा सम्पन्न भएको छ। “नेपालमा लगानीः समृद्धि र एकता” भन्ने नारासहित सम्पन्न यस सम्मेलनमा विभिन्न महत्वपूर्ण निर्णयहरू गरिएका छन्।
नेपाल सरकारका तर्फबाट उद्योग, वाणिज्य तथा आपूर्ति मन्त्री दामोदर भण्डारी प्रमुख अतिथि रहनुभएको थियो। सम्मेलनमा गैरआवासीय नेपाली संघका अध्यक्ष डा. बद्री केसी, नेपाल लगानी बोर्डका प्रतिनिधिहरू, नेपाल सरकारका विभिन्न निकायका प्रतिनिधिहरू, उद्योगी-व्यवसायी, सञ्चारकर्मी तथा विश्वभरबाट आएका २५० भन्दा बढी प्रतिनिधि सहभागी भएका थिए।
मुख्य छलफलका विषयहरू
• नेपालमा लगानी, व्यापार, उद्यमशीलता
• सुरक्षित वैदेशिक रोजगारी र श्रम आप्रवासन
• गैरआवासीय नेपाली नागरिकता
• गोर्खाज्को मुद्दा
• ज्ञान, सीप तथा प्रविधि हस्तान्तरण
• महिला तथा युवा सशक्तीकरण
• च्यारिटी तथा मानवीय सहायता
• पर्यटन प्रवर्द्धन
सम्मेलनका मुख्य निष्कर्षहरू
१. गैरआवासीय नेपाली नागरिकताको निरन्तरता
गैरआवासीय नेपालीहरूलाई वंशजको नागरिकता निरन्तरता दिनुपर्छ भन्ने संवैधानिक व्यवस्थालाई कार्यान्वयन गर्न नेपाल सरकारलाई आग्रह।
२. नेपाली भाषा र संस्कृतिको प्रवर्द्धन
युरोपमा रहेका युवा तथा दोस्रो पुस्ताका नेपालीहरूको भाषा, संस्कृति र पहिचान जोगाउन नेपाली भाषा विद्यालय सञ्चालनका लागि पहल गर्न अनुरोध।
३. १२औं अन्तर्राष्ट्रिय महाधिवेशनको घोषणा
एनआरएनएको १२औं अन्तर्राष्ट्रिय महाधिवेशन २०२५ अक्टोबर ११–१४ मा गर्ने निर्णय। महाधिवेशनलाई व्यवस्थित बनाउन Membership Information System (MIS) लाई प्रभावकारी बनाउने।
४. महिला तथा युवा सशक्तीकरण
महिला तथा युवाहरूको सामाजिक उद्यमशीलता अभिवृद्धि, सीप विकास तालिमलाई निरन्तरता दिने तथा १००० भन्दा बढी नेपाली महिलाहरू भएको देशमा महिला सेल्टर स्थापनाको पहल।
५. नेपाल एनआरएन डेभलपमेन्ट फण्ड सञ्चालन
१० अर्बको नेपाल एनआरएन डेभलपमेन्ट फण्ड सञ्चालन गर्न नेपाल सरकारलाई आवश्यक कानूनी संशोधन सहज बनाउन अनुरोध।
६. नेपाल-युरोप हवाई सेवाको विस्तार
नेपालका हवाई कम्पनीलाई युरोपेली संघको कालोसूचीबाट हटाउन पहल तथा नेपाल-युरोप प्रत्यक्ष उडानको व्यवस्था गर्न नेपाल सरकारलाई अनुरोध।
७. नयाँ नेपाली दूतावास स्थापनाको माग
माल्टा, रोमानिया, क्रोएसिया, पोल्याण्ड, साइप्रस लगायतका देशहरूमा नेपाली दूतावास स्थापना गर्न पुनः आह्वान।
८. अवैध मानव ओसारपसार रोक्न पहल
नेपालबाट पोर्चुगल, इटाली, टर्की, रोमानिया, क्रोएसिया, सर्बिया लगायतका देशहरूमा भइरहेको अवैध आप्रवासन रोक्न जागरूकता अभियान सञ्चालन गर्ने।
९. गैरआवासीय नेपाली सल्लाहकार बोर्ड गठनको माग
एनआरएन अभियानलाई प्रभावकारी बनाउन नेपाल सरकारले संबन्धित मन्त्रालयहरूसँगको समन्वयमा सल्लाहकार बोर्ड गठन गर्नुपर्ने।
१०. PNO (पहिचान पत्र) को कानूनी प्रक्रिया अघि बढाउने
युरोप र एशिया-प्यासिफिक क्षेत्रका नेपाली मूलका विदेशी नागरिकहरू (PNO) लाई नेपालमा आधिकारिक पहिचान दिन पहिचान पत्रको कानूनी प्रक्रिया अघि बढाउने।
११. नेपालमा हरित उर्जा तथा अन्य क्षेत्रमा लगानी प्रवर्द्धन
बिजुली, सूचना प्रविधि, कृषि, जडिबुटी, हरित हाइड्रोजन लगायतका क्षेत्रमा गैरआवासीय नेपालीहरूलाई लगानी गर्न आह्वान।
१२. म्यानमार भूकम्प पीडितलाई आर्थिक सहयोग
एनआरएनए म्यानमार भूकम्प पीडितहरूलाई २० लाख रुपैयाँ सहयोग प्रदान गर्ने।
१३. काठमाडौं हिंसात्मक घटनाप्रति दुःख व्यक्त
२०२५ मार्च २९ मा काठमाडौंमा भएको हिंसात्मक घटनामा सञ्चारकर्मीको निधनप्रति दुःख प्रकट गर्दै मृतक परिवारलाई समवेदना।
१४. १७औं युरोपेली क्षेत्रीय सम्मेलनको घोषणा
एनआरएनएको १७औं युरोपेली क्षेत्रीय सम्मेलन आयरल्याण्डमा आयोजना गर्ने निर्णय।
निष्कर्ष
सम्मेलनमा उठेका मुद्दाहरूलाई सम्बोधन गर्दै नेपाल सरकार, सम्बन्धित निकायहरू र गैरआवासीय नेपाली संघबीच समन्वय आवश्यक रहेको निष्कर्ष निकालिएको छ। सम्मेलन सफलतापूर्वक सम्पन्न गर्न सहयोग गर्ने माल्टा एनसीसी, आयोजक समिति, स्वयंसेवक, प्रायोजक तथा सहभागीहरूलाई धन्यवाद व्यक्त गरिएको छ।
मिति: चैत्र १७, २०८१ (मार्च ३०, २०२५)
स्थान: माल्टा
गैरआवासीय नेपाली संघ, अन्तर्राष्ट्रिय समन्वय परिषद्
