काठमाडौं । जनता समाजवादी पार्टी (जसपा) नेपालले चैत्र मसान्तभित्र देशभरका स्थानीय तहअन्तर्गत वडा, पालिका र जिल्ला समितिहरुको अधिवेशन सम्पन्न गर्ने तयारी गरेको छ। पार्टीका प्रचार, प्रसार तथा प्रकाशन विभाग प्रमुख पूर्ण बस्नेतका अनुसार, पालिका समितिको जिम्मेवारीमा खटाइएका केन्द्रीय अभियन्ताहरूको समन्वयमा अधिवेशन कार्यलाई तीव्रता दिइएको छ।
पार्टीको परिपत्रअनुसार स्थानीय तहको अधिवेशनपछि प्रदेश समिति र पहिचानमा आधारित राष्ट्रिय समितिको अधिवेशन गरिनेछ। जसपा नेपालले प्रदेश समिति तथा राष्ट्रिय समितिको अधिवेशन बैशाख २५ भित्र सम्पन्न गर्ने लक्ष्य राखेको छ। साथै, बैशाख मसान्तसम्म भ्रातृ संगठनहरूको अधिवेशन सम्पन्न गर्ने निर्णय पनि गरेको छ।
‘जनतासँग जसपा नेपाल, आधारभूत सङ्गठन निर्माण अभियान’ अन्तर्गत पार्टी प्रवेश कार्यक्रम, सदस्यता वितरण तथा नवीकरणलगायतका संगठनात्मक गतिविधिहरूलाई तीव्रता दिइएको जसपाले जनाएको छ। पार्टीका अनुसार, यो अभियान २०८२ बैशाख मसान्तसम्म निरन्तर रहनेछ।
