काठमाडौं । चर्चित गायक दुर्गेश थापाले चलचित्र ‘कर्मा’का लागि नयाँ गीत गाएका छन्। सौरभ चौधरीको लेखन तथा निर्देशनमा तयार भएको यो चलचित्रका लागि दुर्गेशले हालै गीत रेकर्ड गरेका हुन्।
रेकर्डिङपछि आइतबार उक्त गीतको भिडियो छायांकन सम्पन्न भएको छ। चलचित्रभित्रै समावेश गरिने यस गीतमा मुख्य कलाकार विपीन कार्की, उपासना सिंह ठकुरी, मुकुन भुसाललगायतको अभिनय रहनेछ। निर्माण टिमका अनुसार केही दिनभित्रै गीत सार्वजनिक गरिनेछ।
यसैबीच, गायक सुशान्त केसीको आवाजमा रहेको ‘पागल पागल जस्तै’ बोलको गीत आज साँझ सार्वजनिक हुँदैछ। ‘कर्मा’ मार्फत पार्श्व गायनमा डेब्यु गरेका सुशान्त केसीले यस गीतमा शब्द, संगीत र स्वर समेत दिएका छन्। उनको गीतप्रतिको लोकप्रियता निकै उच्च रहेको छ, जसका कारण उनको हरेक गीत युट्युबमा मिलियनभन्दा बढी भ्युज पाउन सफल भएका छन्।
चलचित्र ‘कर्मा’ नयाँ वर्ष २०८२ को अवसर पारेर चैत २९ गते नेपाल तथा विदेशमा एकसाथ प्रदर्शन हुँदैछ। एक्सन, ड्रामा र सस्पेन्स जनरामा निर्माण भएको यस फिल्मको कथा निर्देशक चौधरीले नै लेखेका हुन्।
चलचित्रको निर्माण टिममा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन रहेको छ। चलचित्रका लागि अन्तर्राष्ट्रिय प्रदर्शन अधिकार सेभेन सिज सिनेमाले लिएको छ।
‘कर्मा’लाई आर्टिस्टिक इन्टरटेनमेन्टले प्रस्तुत गरेको हो भने वसन्त लम्साल यसका निर्माता हुन्। निर्देशक चौधरीको अघिल्लो फिल्म ‘अगस्त्यः च्याप्टर १’ ले राम्रो दर्शक प्रतिक्रिया पाएको थियो, जसका कारण ‘कर्मा’ प्रति पनि दर्शकको उत्सुकता बढेको छ।
