काठमाडौं उपत्यका अपराध अनुसन्धान कार्यालय, टेकुले बैंकिङ कसूर मुद्दामा फरार रहेका अभियुक्त बिराज तामाङलाई पक्राउ गरेको छ। जिल्ला नुवाकोट, ककनी गाउँपालिका वडा नं. ४ घर भई हाल काठमाडौं जिल्ला, नागार्जुन नगरपालिका वडा नं. ६ रामकोट बस्दै आएका ३६ वर्षीय तामाङलाई मिति २०८१ चैत्र १२ गते काठमाडौं महानगरपालिका वडा नं. १० नयाँ बानेश्वरबाट प्रहरी टोलीले पक्राउ गरेको हो।
ईन्दिरा खड्का लगायतका व्यक्तिको जाहेरीका आधारमा वादी नेपाल सरकार रहेको उक्त मुद्दामा तामाङ फरार रहेका थिए। पक्राउ परेका तामाङमाथि रु. १ करोड ४६ लाख ४४ हजार बिगो कायम गरिएको छ। उनलाई थप अनुसन्धान र आवश्यक कारबाहीका लागि प्रहरी वृत्त, महाराजगञ्ज पठाइएको छ।
सूचना अधिकारी प्रहरी उपरीक्षक काजी कुमार आचार्यका अनुसार, पक्राउ परेका तामाङको नाममा अन्य प्रहरी कार्यालयहरूमा समेत ९ वटा मुद्दा दर्ता भई फरार रहेको अभिलेख फेला परेको छ। यो पक्राउले बैंकिङ कसूर जस्ता अपराधमा संलग्न फरार अभियुक्तहरूलाई कानुनी दायरामा ल्याउने प्रहरीको प्रयासमा ठूलो सफलता मिलेको बताइएको छ।
थप जानकारीका लागि सूचना अधिकारी आचार्यको सम्पर्क नम्बर ९८५१२८१२०१ वा इमेल mpcdspokesperson@gmail.com मा सम्पर्क गर्न सकिने जनाइएको छ।
