महोत्तरी-मधेस प्रदेशका मुख्यमन्त्री सतिशकुमार सिंहले बर्दिवासमा रहेका अस्पताल र स्वास्थ्य संस्थाको अनुगमन गर्दै अनुमति नलिई सञ्चालित सबैलाई तत्काल बन्द गर्न निर्देशन दिनुभएको छ ।
शुक्रबार साँझ प्रदेश स्वास्थ्य निर्देशनालयका अधिकारीसहित बर्दिवासका अस्पताल र स्वास्थ्य संस्थामा आकस्मिक अनुगमन गर्दै उहाँले कानुनी प्रक्रिया पूरा नगरी सञ्चालन गरिएका अस्पताल र स्वास्थ्य संस्था तत्काल बन्द गर्न निर्देशन दिनुभयो ।
बर्दिवासका आठ वटा निजी अस्पताल र स्वास्थ्य संस्थामा उहाँले शुक्रबार छड्के गर्नुभएको थियो । सो क्रममा कानुनी प्रक्रिया पूरा नगरेका पाँच वटा संस्थालाई तत्काल बन्द गर्न उहाँले पत्रमार्फत निर्देशन दिनुभएको हो ।
सुरक्षा अर्थोपेडिक एण्ड डेण्टल क्लिनिक, खर्गा डेन्टल केयर सेन्टर, ॐ समाज डेण्टल हस्पिटल, खोमसुरा डेण्टल क्लिनिक र पिनाकल अस्पताललाई तत्काल बन्द गर्न निर्देशन दिइएको मुख्यमन्त्री सिंहले जानकारी दिनुभयो ।
“जनसेवा हस्पिटलको सम्पूर्ण विवरण उपलब्ध नरहेकोले आवश्यक विवरण अद्यावधिक गर्न र डिएनबी मेडिकेयर सेन्टरलाई तत्काल इजाजत नविकरण गर्न निर्देशन दिएका छौँ”, उहाँले भन्नुभयो । उहाँका अनुसार सबै प्रक्रिया पूरा गरी महेन्द्र डेण्टल क्लिनिक मात्र सञ्चालन भएको पाइएको हो ।
“जनताको स्वास्थ्यसँग सरोकार राख्ने विषयमा लापरबाही गर्न सकिँदैन”, अनुगमनपछि रासससँग मुख्यमन्त्री सिंहले भन्नुभयो, “प्रदेशका आठवटै जिल्लामा यसलाई कडाइका साथ लागू गरिने छ ।” अस्पताल र स्वास्थ्य संस्थाले सञ्चालन गर्नपूर्वका कानुनी प्रक्रिया र सुविधासम्बन्धी मापदण्ड पूरा गर्नुपर्नेमा उहाँले जोड दिनुभयो ।
यसअघि प्रदेशको राजधानी जनकपुरधाम र औद्योेगिक नगरी वीरगञ्जका अस्पताल र स्वास्थ्य संस्थामा छड्के गर्नुभएका सिंहले कानुनी प्रक्रिया पूरा नगरी सञ्चालनमा रहेका सबैलाई बन्द गर्न निर्देशन दिइसक्नुभएको छ ।
मुख्यमन्त्रीको उक्त अनुगमनले अस्पताल र क्लिनिकलाई कानुनी दायरामा ल्याउन र स्वास्थ्यसम्बन्धी सबै मापदण्ड कार्यान्वयन गर्न दबाब सृजना भएको सर्वसाधारणले प्रतिक्रिया दिएका छन् ।
