झापा- नेपाली कांग्रेसका महामन्त्री तथा प्रतिनिधिसभा सदस्य विश्वप्रकाश शर्माले चिया क्षेत्रका समस्या समाधानका लागि पहल गर्ने प्रतिबद्धता व्यक्त गर्नुभएको छ ।
धुलाबारीमा कोशी प्रादेशिक चिया समन्वय समितिको ध्यानाकर्षण पत्र ग्रहण गर्दै उहाँले चिया क्षेत्रका श्रमिक, किसान, उद्योगी तथा व्यवसायीका साझा समस्यालाई समाधान गर्न पहल गर्ने बताउनुभयो । महामन्त्री शर्माले चिया क्षेत्रका सबैखाले समस्याको दीगो समाधानका लागि ऐन बनाउन आवश्यक रहेको भन्दै त्यसका लागि सरकारसँग समन्वय गर्ने बताउनुभयो ।
समितिले चिया निर्यातमा देखिएका समस्याबारे अवगत गराएको थिए । यस्तै, चिया क्षेत्रका लागि हालसम्म ऐन निर्माण नभएको, ऐन–कानुनको अभावमा प्रदेश सरकारले विनियोजन गरेको बजेट खर्च गर्न कठिनाइ भएको र नेपाल सरकारले चिया क्षेत्रको विकास, प्रवर्द्धन र संरक्षणका लागि आवश्यक ध्यान नदिएको पत्रमा उल्लेख छ ।
समन्वय समितिका सदस्य तथा नेपाल चिया उत्पादक सङ्घका महासचिव शुक्र दाहालले ९८ प्रतिशत चिया क्षेत्र कोशी प्रदेशमा भए पनि प्रदेश सरकारले यसको व्यवस्थापनका लागि ठोस पहल नगरेको गुनासो गर्नुभयो ।
रु पाँच अर्ब विदेशी मुद्रासहित वार्षिक करिब रु १३ अर्बभन्दा बढीको कारोबार हुने चिया क्षेत्रको व्यवस्थापनका लागि स्पष्ट ऐन कानुन नहुँदा समस्या भएको व्यवसायीको गुनासो छ ।
राष्ट्रिय चिया तथा कफी विकास बोर्ड क्षेत्रीय कार्यालय बिर्तामोडका प्रमुख इन्द्रप्रसाद अधिकारीले ऐन कानुनको अभावमा चिया क्षेत्रले गैरकृषि अवरोध भोग्नु परेको बताउनुभयो । चिया खेतीमा सिँचाइका लागि लगाइएको चर्को विद्युत् महसुल र ‘डिमान्ड चार्ज’ खारेज गरी कृषि सिँचाइजस्तै सहुलियत महसुलको व्यवस्था गर्नुपर्ने माग रहेको उहाँको भनाइ थियो ।
