त्रिशूली (नुवाकोट- नेपाली कांग्रेसका प्रवक्ता डा प्रकाशशरण महतले विधि र नीतिमा नेपाली कांग्रेस अडिग रहेको बताउनुभएको छ । नुवाकोटको पञ्चकन्या–४ घ्याङस्वारामा नेपाल तरुण दल, नुवाकोट क्षेत्र नं १ को आयोजनामा ‘नेपाली कांग्रेसको एकसय दिने कार्यक्रम’ अन्तर्गत प्रशिक्षण कार्यक्रममा उहाँले पार्टी स्थापना गर्ने संस्थापक नेताहरूको त्याग र योगदानबाट सिर्जित विधि र नीतिले मुलुकको विश्वासिलो र भरपर्दो पार्टीको छवी कायम राख्न कांग्रेस सफल हँुदै आएको बताउनुभयो ।
प्रवक्ता डा महतले नेतृत्वलाई प्रश्न उठाएकै कारण अन्य पार्टीमा कारबाही, निलम्बन र निष्काशन हुने गरेको भन्दै वाक–स्वतन्त्रता, लोकतान्त्रिक पद्दतिको अभ्यास, विधिको शासन, नीति प्रधान भएकै कारण आफ्नो पार्टीमा सो समस्या नरहेको उहाँको दाबी थियो ।
प्रशिक्षणमा प्रतिनिधिसभा सदस्य सीता मिजार, कांग्रेस नुवाकोट सभापति रमेशकुमार महत, नेता डा केदारनरसिंह केसी, कांग्रेस बागमती प्रदेश कार्यसमितिका प्रवक्ता तिलक रुवाली, रसुवा सभापति प्रभात तामाङ, तरुण दल १ नंं क्षेत्रीय अध्यक्ष शरण घलेलगायतले पार्टीमा युवाको सहभागिताका लागि भातृ संस्थालाई चलायमान बनाउनुपर्ने बताउनुभयो ।
पार्टीमा कार्यकर्ता उत्पादनको लागि नर्सरीको रूपमा रहेका नेपाल विद्यार्थी सङ्घ, तरुण दललगायतमा धेरैभन्दा धेरै सदस्य आबद्ध गराउन जोड दिनुपर्ने उहाँहरूको धारणा थियो ।
