मोरङ-कोशी प्रदेशका मुख्यमन्त्री हिक्मतकुमार कार्कीले अख्तियार दुरुपयोग अनुसन्धान आयोगले भ्रष्टाचारजन्य कार्यको अनुसन्धान दु्रतगतिमा गर्नुपर्ने बताउनुभएको छ । अख्तियार दुरूपयोेग अनुसन्धान आयोग कार्यालय इटहरीद्वारा विराटनगरमा आयोजित भ्रष्टाचार नियन्त्रण तथा सुशासन प्रवर्द्धनसम्बन्धी प्रदेशस्तरी कार्यक्रममा उहाँले अनुसन्धानका नाममा लामो समयसम्म काम लम्ब्याउन नहुने तर्क गर्नुभयो ।
मुख्यमन्त्री कार्कीले कानुनले गर्न भनेका काम गलत ढङ्गले गर्ने र नगर्नुपर्ने काम गरेका विषयमा आयोगले थप जनशक्ति प्रयोग गरी समयमै फछ्र्याेट गर्नुपर्नेमा सुझाव दिनुभयो । उहाँले आयोगको अनुसन्धानका परिणामप्रति सरकार, जनता र सञ्चार जगत् सन्तुष्ट नभएको गुनासो व्यक्त गर्नुभयो । आयोगले बेनामे उजुरी नलिन आग्रह गर्दै उहाँले यसबाट भ्रष्टाचारजन्य अन्य मुद्दामा अनुसन्धानमा सहयोग पुग्ने विचार राख्नुभयो ।
मुख्यमन्त्री कार्कीले सम्पूर्ण जनप्रतिनिधिले विधिको शासन र कानुनी प्रक्रिया मिलाएर कार्य गर्नुपर्नेमा जोड दिँदै यसबाट मुलुकमा भ्रष्टाचारको अन्त्य भई सुशासन कायम हुने बताउनुभयो ।
प्रदेशका प्रमुखसचिव केदारनाथ शर्माले सरकारले भ्रष्टाचार नियन्त्रण र सुशासन कायम गर्न जिम्मेवारीपूर्वक कार्य गरिरहेको बताउनुभयो । आयोगका आयुक्त डा हरि पौडेलले गलत प्रवृत्तिका उजुरीलाई तामेलीमा राख्ने गरेको जानकारी दिँदै बेनामे उजुरीबाट ठूला भ्रष्टचारजन्य कार्यको जानकारी प्राप्त हुने गरेको विचार राख्नुभयो ।
आयोगका सह न्यायायाधिवक्ता गङ्गाप्रसाद पौडेल र आयोगको इटहरी कार्यालयका प्रमुख सुरेश न्यौपानेले आयोगले गरेका कार्यका सम्बन्धमा कार्यपत्र प्रस्तुत गर्नुभएको थियो ।
आयोगका उपसचिव नीरजकुमार देवले मुलुकमा भ्रष्टारचार नियन्त्रण र सुशासन कायम गर्न चेतना जगाउन प्रत्येक प्रदेशमा यस प्रकारको कार्यक्रमको आयोजना गर्ने उद्देश्य रहेको बताउनुभयो । कार्यक्रममा प्रदेशका मन्त्री, महानगर, नगरपालिका, गाउँपालिकाका प्रमुख–उपप्रमुखलगायत कर्मचारीको सहभागिता थियो ।
