बाजुरा, २३ मङ्सिरः सदरमुकाम मार्तडीमा आज दिउँसो स्कारपियो जिप दुर्घटना हुँदा एक जनाको घटनास्थल र एक जनाको जिल्ला अस्पताल बाजुरामा उपचारका क्रममा मृत्यु भएको छ भने तीन जना घाइते भएका छन् ।
बडीमालिका नगरपालिका–८ मा रहेको मालिका मन्दिरमा दर्शन गरेर फर्किने क्रममा मार्तडी कोल्टी सडक खण्डमा पर्ने अपी होटल नजिकै सु प प्र ०१ ००१ च ४३१६ नम्बरको स्कारपियो दुर्घटना भएको जिल्ला प्रहरी कार्यालय बाजुराले जनाएको छ ।
दुर्घटनामा परी मृत्यु हुनेमा कञ्चनपुरकाभीमदत्त नगरपालिका–१७ की ३१ वर्षीया गायत्री पन्त हुनुहुन्छ । यस्तै, दुर्घटनामा घाइते भएर उपचारका क्रममा भीमदत्त नगरपालिका–१८ की राधिका भट्टको मृत्यु भएको छ ।
दुर्घटनामा घाइते हुनेमा शिक्षा विकास तथा समन्वय इकाइ कार्यालय बाजुराका कार्यालय सहयोग गौमुल गाउँपालिका–४ बस्ने २५ वर्षीय रमेश धामी, कञ्चनपुर जिल्ला कृष्णपुर–५ गुलरियाका मोहनदेव भट्ट र भीमदत्त नगरपालिका–१७ का ३९ वर्षीय लोकेन्द्र पन्त घाइते भएको जिल्ला प्रहरी कार्यालय बाजुराका प्रहरी नायब उपरीक्षक दिलीपकुमार गिरीले जानकारी दिनुभएको छ ।
मृतक दुवै जनाको शव परीक्षणका लागि जिल्ला अस्पताल बाजुरामा राखिनेछ । घाइतेहरुको हाल जिल्ला अस्पताल बाजुराका उपचार भइरहेको छ ।
