नेकपा एमालेका उपमहासचिव प्रदीप ज्ञवालीले सामाजिक अराजकता फैलाई जनतामा निराशा छर्ने प्रयास भइरहेको बताउनुभएको छ । नेकपा एमाले केन्द्रीय प्रचार तथा प्रकाशन विभाग र प्रेस चौतारी नेपालले बुधबार काठमाडौंमा आयोजना गरेको पत्रकारहरुसंगको छलफलका क्रममा ज्ञवालीले अराजकता र अस्थिरता चाहनेहरू एक ठाउँमा आउन खोजिरहेको समेत बताउनुभयो ।
देशको प्रधानमन्त्रीको नागरिकता र हस्ताक्षर किर्ते गर्नेले भविष्यमा जस्तोसुकै अपराध गर्नसक्ने भएकाले सवै सजक हुनुपर्ने धारणा राख्नुभयो । मुलुकको परिवर्तनका मुख्य संवाहक नेपाली कांग्रेस र नेकपा एमाले नै भएका बताउँदै उहाँले अहिले पनि अराजकता र अस्थिरता अन्त्यको लागि दुई दल एक ठाउँमा उभिनुपरेको जिकिर गर्नुभयो ।
कांग्रेस एमाले नमिल्दा माओवादी अध्यक्ष प्रचण्डले अस्थिरतामा खेलिरहेका कारण दुई दल एक ठाउँमा उभिन बाध्य भएको उहाको भनाइ छ । त्यस्तै ज्ञवालीले सरकारबाट हट्ने बित्तिकै प्रचण्डले अनेक खालका तिकडम अपनाउन थालेको आरोप समेत लगाउनुभयो ।
ज्ञवालीले केपी ओली नेतृत्वको सरकार बनेपछि सुशासनका साथै अर्थतन्त्र सुधारको सङ्केत देखिएको बताउनुभयो । एमालेको राष्ट्रिय स्वतन्त्र पार्टी र रवि लामिछानेसँग कुनै प्रतिस्पर्धा नै नभएको भन्दै उहाले एमालेले रास्वपा र रवि लामिछानेलाई फसाउनु पर्ने कुनै कारण नभएको स्पष्ट पार्नुभयो । ज्ञवालीले देश बन्दैछ भन्ने सन्देश जनतालाई दिनका लागि मंसिर ७ गते काठमाडौंको दरवारमार्गमा जागरण सभा आयोजना गरिएको बताउनुभयो ।
