काठमाडौँ । कलाकार राजु मास्टरले बनाउँदै आएको सकस सिरियल अब सातामा नै २ दिन हेर्न पाइने भएको छ । यसअघि प्रत्येक शनिबार साँझ ७ बजे हिमालय टिभि र ७ः३० मा मास्टर टिभी युट्युव च्यानलबाट प्रसारण हुँदै आएको सकस अब शनिबार र मंगलबार साताकै दुईदिन हेर्न पाइने भएको छ । प्रसारणको १ बर्ष पुरा गरेर दोस्रो बर्षमा प्रवेश गर्दै गर्दा हप्तामा दुईदिन आउने भएको हो । आउँदो शनिबार ५२ भाग प्रसारण हुँदैछ भने मंगलबार ५३ भाग प्रसारण हुनेछ ।
पछिल्लो समय सकस सिरियललाई एक सातामै युट्युवमा १५ लाख भन्दा बढी पटक हेरिने गरिन्छ । कुनै भागहरु २० देखी २५ लाख पटक पनि हेरिएको छ । नेपाली सिरियलहरुको भिडमा सकसले आफ्नो छुट्टै पहिचान बनाउँदै गएको छ । यो सिरियललाई लेखन तथा निर्देशक राजु मास्टर अर्थात राजु पौडेलले गर्दै आएका छन् । सिरियलमा उनको पनि मुख्य अभिनय छ । यस्तै सिरियलमा राजुसँगै तारा केसी, बिनोश श्रेष्ठ, श्री प्रसाद थापा, अन्जु निरौला, प्रमिला खनाल, मुकेश हमाल, कमला रेग्मी, अमृता श्रेष्ठ लगायतको अभिनय रहेको छ । सकस सिरियलले छोटो समयमै लोकप्रियता हासिल गरिसकेको छ ।
