काठमाडौँ – खानेपानीमन्त्री प्रदीप यादवले काठमाडौँ उपत्यकामा सहज रुपमा खानेपानी सेवा उपलब्ध गराउन मातहतका निकायलाई निर्देशन दिनुभएको छ ।
काठमाडौँ उपत्यकाका खानेपानी संरचनामाथि भएका अध्ययन प्रतिवेदनका सम्बन्धमा मन्त्रालयमा आयोजित अन्तरक्रियामा मन्त्री यादवले उक्त निर्देशन दिनुभएको हो ।
उहाँले भन्नुभयो, “काठमाडौँमा खानेपानीको दीगो व्यवस्थापनका लागि वित्तीय, प्राविधिक, कानुनी पाटोमा समयसापेक्ष सुधार गरी संविधान प्रदत्त खानेपानी सेवा सहज रुपमा उपलब्ध गराउन म निर्देश गर्छु ।” उहाँले पानी वितरणमा देखिएको समस्याकाे दीर्घकालीन समाधानमा लाग्न समेत निर्देशन दिनुभएको मन्त्रालयका सहसचिव रमाकान्त दुवाडीले जानकारी दिनुभयो ।
त्यसअवसरमा विज्ञ डा महेश भट्टराईले खानेपानी क्षेत्रका सम्बन्धमा सुधारका लागि हालसम्म भएका अध्ययनहरु समावेश प्रस्तुतीकरण गर्नुभएको थियो ।
काठमाडौँ उपत्यकामा खानेपानीको सहज आपूर्तिका लागि अल्पकालीन, मध्यकालीन र दीर्घकालीन रुपमा चाल्नुपर्ने कदममाथि छलफल भएको मन्त्रालयका सचिव ई प्रमिलादेवी शाक्य बज्राचार्यले जानकारी दिनुभयो ।
अन्तक्रियामा काठमाडौँ उपत्यका खानेपानी लिमिटेड (केयुकेएल), काठमाडौँ उपत्यका खानेपानी व्यवस्थापन बोर्ड, आयोजना कार्यान्वयन निर्देशनालयलगायतका प्रतिनिधिले सरकारको नीतिअनुसार थप व्यवस्थित र चुस्त बनाउने विषय विषयमा धारणा राख्नुभएको थियो ।
