सुनसरी १९ साउन । एसिड प्रहार गरेको अभियोगमा एक जनालाई प्रहरीले पक्राउ गरेको छ ।
पक्राउ पर्नेमा बराहक्षेत्र नगरपालिका ३ हर्दिया बस्ने ३० वर्षीय रोमन राजधामी रहेका छन् ।
गत साउन १२ गते चुरोटको विषयमा आफ्नै श्रीमतीसँग विवाद भएपछि श्रीमतीलाई एसिड आक्रमण गर्न खोज्दा श्रीमती छिमेकीको घरमा शरण लिन गएको अवस्थामा ती महिलाको घरमा गई ढोका खोल् भन्दै लात्तीले हानेपछि ती महिलाको टाउकोमा तथा अनुहारमा एसिड प्रहार गरेका थिए ।
घाइते ४३ वर्षीया महिलालाई उपचारको लागि विपि कोईराला स्वास्थ्य विज्ञान प्रतिष्ठान घोपा धरान हुँदै थप उपचारको लागि म्याक्स अस्पताल विराटनगरमा पठाएको प्रहरीले जनाएको छ । निजलाई ईलाका प्रहरी कार्यालय महेन्द्रनगरको टोलीले महानगरीय प्रहरी वृत्त गौशाला काठमाडौंको सहयोगमा काठमाडौं गौशालाबाट शुक्रबार पक्राउ गरेको हो ।
निजलाई एसिड आक्रमण मुद्दामा सुनसरी जिल्ला अदालतबाट ७ दिन म्याद थप अनुमति लिई थप अनुसन्धान भइरहेको जिल्ला प्रहरी कार्यालय सुनसरीले जनाएको छ ।
