काठमाडौँ-नेपाल सरकारका मुख्यसचिव एकनारायण अर्यालले बजारमा माग र आपूर्तिको अवस्था बुझेर योजनाबद्ध रुपमा बजार अनुगमन गर्न सरोकारवाला निकायलाई निर्देशन दिनुभएको छ ।
तराई विकास सञ्चार केन्द्र नेपालले आयोजना गरेको ‘बजारको सुशासनमा देखिएका चुनौती र हाम्रो दायित्व’ विषयक कार्यक्रममा मुख्यसचिव अर्यालले कार्य योजना बनाई बजार अनुगमनलाई प्रभावकारी बनाउन सरोकारवाला निकायहरुलाई निर्देशन दिनुभएको हो ।
उहाँले भन्नुभयो, “चाडपर्व सुरु भएपछि बजारमा मूल्यवृद्धि, मिसावट सुरु हुने गरेको गुनासो आउने गरेको छ, उपभोक्तालाई ठगिन नदिन कार्य योजना बनाएर बजार अनुगमन गर्नुहोला ।” उहाँले बजार अनुगमनको सङ्ख्या बढाउने भन्दा उपभोक्ताले महसुस गर्नेगरी अनुगमन गर्न निर्देशन दिनुभयो । चाडपर्वको बेलामा खाद्यान्नमा मिसावट हुने, मूल्य वृद्धि गर्ने र कालोबजारी गर्नेलाई कानुनी दायरामा ल्याउनसमेत उहाँले निर्देशन दिनुभयो ।
स्थानीय तहसँग समन्वय गरेर मिसावट भएका, गुणस्तर नभएका सामान सप्लाइ गर्ने र मूल्यवृद्धि गर्नेलाई कारबाही गर्नुपर्ने उहाँको भनाइ थियो । उहाँले भन्नुभयो, “उपभोक्ता ठग्नेलाई कारबाहीको दायरामा ल्याउनु होला, कसैले धम्क्याए मलाई जानकारी दिनुहोला ।”
मुख्य सचिव अर्यालले चाडपर्वको बेलामा भएका आपराधिक गतिविधिहरुको रिपोर्ट प्रस्तुत गर्न पनि प्रमुख जिल्ला अधिकारीहरुलाई आग्रह गर्नुभयो । सडकलाई खाल्डाखुल्डीरहित बनाउन, पहिरोहरु पन्छाएर सडक व्यवस्थापन सहज बनाउन, सवारी साधनको उपलब्धता सहज गर्न र घटस्थापना भन्दा १५ दिन अघिदेखि गाडीको टिकट खुलाउन मुख्य उहाँले आग्रह गर्नुभयोे ।
नागरिकले शान्तिपूर्वक चाडपर्व मनाउन उहाँले निर्देशन दिनुभयो । उक्त कार्यक्रममा काठमाडौँका प्रमुख जिल्ला अधिकारी जयनारायण आचार्य, ललितपुरका प्रमुख जिल्ला अधिकारी तुलसीबहादुर श्रेष्ठ तथा भक्तपुरका प्रमुख जिल्ला अधिकारी रोशनीकुमारी श्रेष्ठले नागरिकको अपेक्षाअनुसार अनुगमन गरिँदै आएको जानकारी दिनुभएको थियो ।
कार्यक्रमका सभापति एवं तराई विकास सञ्चार केन्द्र नेपालका अध्यक्ष गोविन्द चौलागार्इँले स्वच्छ र प्रतिस्पर्धी बजार बनाउन सरकारी अनुगमन मात्रै पर्याप्त नहुने भएकाले स्वच्छ बजार कायम गर्न उत्पादक, उद्योगी, व्यापारी जिम्मेवार एवं जवाफदेही हुनुपर्ने तथा स्वयं उपभोक्ता पनि सचेत हुनुपर्नेमा जोड दिनुभयो ।
