जनकपुर-जनता समाजवादी पार्टी नेपालका अध्यक्ष उपेन्द्र यादवले आफ्नो अधिकारका लागि मधेसी जनता अझै पनि तत्पर रहनुपर्ने आवश्यकता औंल्याउनुभएको छ । जसपा नेपालको मधेस प्रदेश कमिटीले जनकपुरधाममा आयोजना गरेको अभिमुखीकरण कार्यक्रममा उहाँले मधेस अझै पनि अधिकार सम्पन्न हुन नसकेकाले विभिन्न रुपमा आन्दोलन जारी राख्न नेता तथा कार्यकर्ताहरुलाई आग्रह गर्नुभयो । अध्यक्ष यादवले मेचीदेखि महाकालीसम्मका मधेसी जनताले आगामी दिनमा मतको लडाइँसमेत लड्नुपर्ने बताउनुभयो ।
अध्यक्ष यादवले भन्नुभयो, “अन्तरिम संविधानमा लेखिएको छ, मधेस प्रदेशसहितको अन्य प्रदेश तर, त्यो कार्यान्वयन हुन सकेको छैन ।” तथापि अब आगामी दिनमा अहिलेको आठ जिल्लाको मधेसलाई समग्र मधेस प्रदेशका लागि मधेसी जनताले मतको लडाइँ लड्न बाँकी रहेको उहाँले उल्लेख गर्नुभयो ।
यो आठवटा जिल्लामात्र मधेस नरहेको उल्लेख गर्दै नेता यादवले अबको लडाइँ आन्दोलनबाट नभई मतको लडाइँ गर्न तयारी थाल्नुपर्ने आवश्यकता औँल्याउनुभयो । यता अभिमुखीकरण कार्यक्रममा आठवटा जिल्लाका प्रतिनिधिहरुको सहभागिता रहेको थियो ।
