गोदार (धनुषा-मधेस प्रदेशका मुख्यमन्त्री सतिशकुमार सिंहले प्रदेशभर प्रविधिमैत्री अवधारणा लागु गर्ने उद्देश्यले नेपाल दूरसञ्चार प्राधिकरणका प्रतिनिधिहरूसँग छलफल गर्नुभएको छ । उहाँले दूरसञ्चार प्राधिकरण, प्रादेशिक निर्देशनालय वीरगञ्जका निर्देशक नामाकर न्यौपानेसहितका प्रतिनिधिहरूसँग सो विषयमा छलफल गर्नुभएको हो ।
मुख्यमन्त्री सिंहले विशेषगरी वन क्षेत्रमा सर्वसाधारणले भोगिरहेका नेटवर्कको समस्या निराकरण गर्न प्राधिकरणसँग आग्रह गर्नुभयो । उहाँले प्राधिकरणको सेवा राम्रो र स्तरीय बनाउनुपर्नेमा जोड दिनुभयो । उहाँले खासगरी मधेस प्रदेश महोत्तरीदेखि पर्सासम्मको महेन्द्र राजमार्ग क्षेत्रमा पर्ने जङ्गलमा नेटवर्कको निकै समस्या रहेको जानकारी गराउँदै सो समस्यालाई समाधान गर्न सुझाव दिनुभयो ।
“जङ्गलको सो क्षेत्रमा नेटवर्क नहुँदा दैनिकजसो सयौँ सर्वसाधारणले समस्या भोगिरहेका छन् । त्यस क्षेत्रमा दुर्घटना हुँदा, गाडी बिग्रिँदा वा यात्राका क्रममा कुनै आकस्मिक समस्या पर्दा सर्वसाधारणलाई नेटवर्क नहुँदा ठूलो समस्या हुने गरेको छ,” मुख्यमन्त्री सिंहले भन्नुभयो । उहाँले प्रदेशको सबै जिल्ला, नगरपालिका र गाउँपालिकामा इन्टरनेटको सेवासुविधा चुस्तदुरुस्त बनाउनुपर्नेमा जोड दिनुभयो ।
प्रविधिमैत्री सरकारको अवधारणा बनाउनुभएका मुख्यमन्त्री सिंह प्रदेशको सार्वजनिक सेवा प्रभावकारी, उत्तरदायी, पारदर्शी र तथ्यपरक बनाउन अग्रसर देखिनुभएको छ । प्रदेशवासीको घरघरमा इन्टरनेट र सहज नेटवर्कको सुविधा पुगेमात्रै सरकारको प्रविधिमैत्री योजना सफल हुनेहुँदा उहाँले अहिले चौतर्फी रूपमा सम्बन्धित निकायसँग सेवा विस्तारका लागि समन्वय गरिरहनुभएको छ ।
