काठमाडौं – कृषि तथा पशुपन्छी विकासमन्त्री रामनाथ अधिकारीसँग नेपालका लागि गणतन्त्र कोरियाका राजदूत पार्क तेयोङगले शिष्टाचार भेट गर्नुभएको छ । सिंहदरबारस्थित मन्त्रालयमा भएको भेटमा उहाँहरूबीच नेपाल र कोरियाबीचको सम्बन्ध, आपसी सहयोग आदानप्रदान र कृषि क्षेत्रमा लगानी तथा सीपलगायत विषयमा छलफल भएको थियो ।
भेटमा मन्त्री अधिकारीले नेपालमा कृषि क्षेत्रमा लगानी प्राथमिकताका क्षेत्रहरूबारे अवगत गराउनुहुँदै द्विपक्षीय लगानी र सहकार्यका बारेमा चर्चा गर्नुभएको थियो । उहाँले नेपालमा उन्नत जातको आलुको बीउ उत्पादन र हाइब्रिड धान उत्पादन प्रविधिमा दुई देशबीच सहकार्य गर्न सकिने धारणा राख्नुभयो ।
मन्त्री अधिकारीले नेपालमै हाइब्रिड बीउबिजन तथा जैविक विषादी, मिश्रित रासायनिक मल उत्पादनमा दक्षिण कोरियाको लगानी र प्रविधि सहयोगको अपेक्षा गर्नुभयो । विगतमा कोरियाबाट नेपाललाई उच्च नस्लका गाई उपलब्ध गराएकामा धन्यवाद ज्ञापन गर्नुहुँदै उहाँले यसबाट नेपालको दुग्ध उत्पादनमा सहयोग पुग्ने विश्वास व्यक्त गर्नुभयो ।
राजदूत तेयोङगले नेपालबाट कोरियामा रोजगारीका लागि जानेमध्ये धेरै कृषि क्षेत्रका कामदार रहेको र नेपाल फर्किएपछि त्यहाँ सिकेको सीप कृषि क्षेत्रमै काम लगाउन सके सकारात्मक परिवर्तन देखिने धारणा राख्नुभयो ।
नेपालको कृषि क्षेत्रमा कोरियाबाट गर्दै आएको सहयोगको निरन्तरताका लागि सरकार तयार रहेको भन्नुहुँदै राजदूत तेयोङगले निकट भविष्यमा त्यससँग जोडिएर कोरियाली उच्चस्तरीय प्रतिनिधिमण्डको नेपाल भ्रमण हुने जानकारी दिनुभयो ।
