गोदावरी (ललितपुर), २५ साउनः वन तथा वातावरणमन्त्री ऐनबहादुर शाही ठकुरीले सामुदायिक वन उपभोक्ता समूहले व्यवस्थापन गरेका वनहरूको थप प्रभावकारी संरक्षण, विकास र सदुपयोग गर्न तीनै तहका सरकारको भूमिका र सहभागिता सुनिश्चित गर्नुपर्ने बताउनुभएको छ ।

वन तथा भू संरक्षण विभागले सामुदायिक वन दिवसका अवसरमा आज आयोजना गरेको कार्यक्रममा मन्त्री ठकुरीले विगतका उपलब्धि, अनुभव र सहभागिताका आधारमा संरक्षणका क्षेत्रमा सहकार्यलाई थप बलियो बनाउँदै लैजानुपर्ने धारणा राख्नुभयो । उहाँले भन्नुभयो,“विगत चार दशकभन्दा लामो समयको उपलब्धि, अनुभव र सहभागितामूलक व्यवस्थापनबाट दिगो विकास लक्ष्य हासिल गर्न, जलवायु परिवर्तन न्यूनीकरण र अनुकूलन, जैविक विविधता संरक्षण, वातावरणीय सन्तुलन कायम गर्न तीनै तहका सरकारको भूमिका छ । त्यसैले सरकार, समुदाय, गैरसरकारी, निजी क्षेत्र र विकास साझेदारलगायत सरकार भएकाहरूबीच आगामी दिनमा समेत निरन्तर सहयोग र थप सहकार्य बढाउँदै जाने अपेक्षा गरेको छु ।”

कार्यक्रममा विभिन्न संस्थालाई पुरस्कृत गरिएको थियो । गणेशमान सिंह सामुदायिक वन राष्ट्रिय पुरस्कारबाट जनज्योति सामुदायिक वन उपभोक्ता समूह बारा (प्रथम) नगद रु एक लाख, नागी समुदायिक वन उपभोक्ता समूह म्याग्दी (द्वितीय) नगद रु ७५ हजार, दियालो सामुदायिक वन उपभोक्ता समूह झापा र उमाचोक सामुदायिक वन उपभोक्ता समूह तनहुँ (तृतीय) लाई नगद रु ५०÷५० हजारसहित पुरस्कृत गरिएको थियो । यसैगरी धानखेती सामुदायिक वन उपभोक्ता समूह मोरङ र सिङदर्जा सामुदायिक वन उपभोक्ता समूह रूपन्देहीलाई सान्त्वना स्वरूप रु २५÷२५ हजारसहित पुरस्कृत गरियो ।

यस्तै, कबुलियती वन राष्ट्रिय पुरस्कारबाट बेनडाँडा कबुलियती वन समूह पाल्पा (प्रथम) लाई रु एक लाख र सिमपानी कबुलियती वन समूह पाँचथर (द्वितीय) लाई रु ७५ हजार नगदसहित पुरस्कृत गरिएको छ ।

उहाँहरूलाई प्रमुख अतिथि मन्त्री ठकुरी, विभागका महानिर्देशक शिवकुमार वाग्ले र वन तथा वातावरण राज्यमन्त्री रूपा विकले दोसल्ला ओढाएर सम्मानसहित पुरस्कार प्रदान गर्नुभएको थियो ।

वन तथा भूसंरक्षण विभागका उपमहानिर्देशक धनजय लामिछानेले संरक्षणमा योगदान पु¥याएवापत ती वन समूहलाई पुरस्कृत गरिएको बताउनुभयो । उहाँले देशभर २३ हजारभन्दा बढी सामुदायिक वनले संरक्षणका क्षेत्रमा महत्वपूर्ण काम गरिरहको बताउनुभयो । “हालसम्म देशभरका २३ हजारभन्दा बढी समुदायिक वन उपभोक्ता समूहले करिब २६ लाख हेक्टर क्षेत्रफलमा वनको संरक्षण, व्यवस्थापन र सदुपयोग गरिरहेका छन् भने करिब ३३ लाख घरधुरीहरू लाभान्वित भएका छन्”, उपमहानिर्देशक लामिछानेले भन्नुभयो,“यसबाट स्थानीय समुदायको जीविकोपार्जन सुधार, स्थानीय समुदायको नेतृत्व विकास तथा लैङ्गिक र सामाजिक समावेशीकरणमा उल्लेख्य योगदान पुगेको छ ।”

यस वर्ष ‘समुदायिक वनको प्रभावकारिता तीनै तहका सरकार र समुदायको सहभागिता’ भने नाराका साथ देशभरका वन कार्यालय, सामुदायिक वनलगायत समुदायमा आधारित वन समूह र विभिन्न सङ्घसंस्थाहरूले विविध कार्यक्रम गरी सामुदायिक वन दिवस–२०८१ मनाइएको छ ।