गलकोट (बागलुङ), २१ साउनः जिल्लाको आदलत चौपारी–गौडाकोट–तित्याङ–भकुण्डे हुँदै रायडाँडा सडक २१ वर्षपछि स्तरोन्नति थालिएको छ । बागलुङ बजारबाट तित्याङ हुँदै भकुण्डे रायडाँडा पुग्ने सडक दुई वर्षभित्र कालोपत्र सक्नेगरी स्तरोन्नति थालिएको हो ।
वैशाखदेखि काममा आएको निर्माण व्यवसायीले दुई महिनाको प्रगति तित्याङ खण्डमा छ किलोमिटर सडक चौडा बनाइसकेको छ । साथै बागलुङ बजारको अदालत चौपारीबाट पूर्वाधार निर्माण थालिएको जनाएको छ ।
बागलुङ नगरपालिकाभित्रका अफ्ठ्यारो खण्डका रुपमा रहेको तित्याङ र भकुण्डे पुग्ने सडक २४ महिनाभित्र कालोपत्र गरिसक्ने गरी निर्माण व्यवसायीले ठेक्का सम्झौतापछि कामलाई तीव्रता दिएका नगर कार्यालयले जनाएको छ । बागलुङ बजारको अदालत चौपारीबाट गौँडाकोट, तित्याङ, दह, भुकण्डे हुँदै रायडाँडाको सिमानासम्म पुग्ने सडक स्तरोन्नतिपश्चात् कालोपत्र गरिने निर्माण कम्पनीका सञ्चालक धु्रव बिडारीले बताउनुभयो ।
यसअघि ठेक्का सम्झौता गरेर काम नगर्ने प्रवृत्तिले २१ वर्षसम्म स्तरोन्नति हुन नसकेको उक्त खण्डमा अहिले भने तीव्र गतिमा काम भइरहेको स्थानीय बताउँछन् । बिडारीले १५ किमी सडक कालोपत्र गर्नुपर्ने सम्झौता भएअनुसार छ किमी चौडा पारिएको जनाउँदै बागलुङ बजारबाट ग्याबिन, मेसिनरी पर्खाल र नालीको काम थालिएको बताउनुभयो ।
“गत चैत १६ गते दुई वर्षभित्र स्तरोन्नतिसहित कालोपत्र सम्पन्न गर्न सम्झौता गरेका थियौँ । वैशाखदेखि काम थलिएकामा अहिलेसम्म सन्तोषजनक भइरहेको छ । सबैको साथ र सहयोग भएमा म्याद सकिनु पहिला नै कालोपत्र सम्पन्न गर्ने योजना छ”, सञ्चालक बिडारीले भन्नुभयो, “तित्याङ खण्डमा औजारको काम र बागलुङ बजारबाट गौँडाकोटसम्म ज्यामीको काम भइरहेको छ, बिस्तारै कामदार थप गरी कामलाई तीव्रता दिनेछौँ ।”
विसं २०६० मा स्थानीयले चन्दा सङ्कलन गरेर उक्त सडकको ट्र्याक खोलिएको थियो । करिब २१ वर्षपछि कालोपत्रसहित स्तरोन्नति हुन थालेपछि तित्याङ, भकुण्डे र रायडाँडाका स्थानीयलाई सहज हुने भकुण्डेका चन्द्रप्रकाश शर्माले बताउनुभयो । उहाँले सम्झौता भएसँगै निर्माण व्यवसायी कार्यक्षेत्रमा खटिनु सकारात्मक पक्ष भएको भन्दै यथाशीघ्र गुणस्तरीय काम सम्पन्न गर्न स्थानीयले निरन्तर सहयोग गर्ने प्रतिबद्धता व्यक्त गर्नुभयो ।
ट्र्याक खोलुको २१ वर्षसम्म अलपत्र बनेको सडकअन्तर्गत अहिले १५ किमी कालोपत्र र स्तरोन्नति थालिएपछि स्थानीय खुसी भएका छन् । पर्यटकीय गाउँ भकुण्डेसम्म पुग्न उक्त खण्ड प्रयोग हुने गरेको भन्दै शर्माले स्तरोन्नतिपछि आन्तरिक तथा बाह्य पर्यटकको आगमन बढ्ने अपेक्षा लिइएको बताउनुभयो । “दुर्गम गाउँमा सडक सञ्जाल विस्तार भई विकास महसुस गरिरहेको अवस्थामा बजार नजिकैको तित्याङ, भकुण्डे, र रायडाँडाका नागरिकले लामो समयदेखि जोखिमपूर्ण यात्रा गर्दै आएका थियौँ”, शर्माले भन्नुभयो, “ढिलै भए पनि सरकारले बजेट व्यवस्थापन ग¥यो, यसमा हाम्रो सकारात्मक सहयोग गरहनेछ ।”
उक्त सडक कालोपत्र गर्न रु ३१ करोड ९६ लाख ३५ हजारमा निर्माण व्यवसायीसँग सम्झौता भएको थियो । निर्माण व्यवसायीले समयसीमाभित्रै काम सम्पन्न गरेमा दुई वर्षमा तित्याङ हुँदै भकुण्डेसम्म सवारीसाधन गुड्नेछन् । भकुण्डे जिल्लाको पहिलो ग्रामीण पर्यटकीय गाउँका रुपमा परिचित छ । यहाँ जिल्लाकै पहिलो घरबास सञ्चालनमा आए पनि सहज सडक सुविधा नहुँदा पर्यटकलाई असहज हुँदै आएको थियो । उकालो र घुम्ती सडकमा ढलान तथा अन्य भागमा चिनियाँ प्रविधिबाट कालोपत्र गरिने निर्माण व्यवसायीले जनाएको छ ।
