अन्नपूर्ण–३ काभ्रेकी देवी बुढाथोकीलाई धारामा खानेपानीका लागि पालो पर्खनुपर्ने झण्झट हटेको छ । वर्षौदेखि गाउँमा अधिकांश घरधुरीले खानेपानीका लागि एउटै धारामा निर्भर भए पनि अहिले घर–घरमा ‘एक घर एक धारा’ सुविधा विस्तार भएपछि बुढाथोकीसहित यहाँका ७० घरधुरीलाई खानेपानीका लागि पालो कुर्ने बाध्यता हटेको हो ।

गोर्खा वेल्फेयर ट्रष्टको आर्थिक सहयोगमा रु ६४ लाख बजेटबाट काभ्रे गाउँका सबै घरधुरीमा खानेपानी सुविधा पु¥याइएको छ । तुसारेपानीको मुहान्बाट पानी ट्याङ्की निर्माण, सङ्कलन, वितरण पाइपलाइन र घरघरमा धारा निर्माण गरेर खानेपानी विस्तारको योजनामा स्थानीयले रु २१ लाख बराबरको श्रमदान गरेको निर्माण समितिका सचिव पूर्णबहादुर बुढाथोकीले जानकारी दिनुभयो ।

कालीगण्डकी कोरिडोरको बेनी–जोमसोम सडक काभ्रे गाउँको पुछारबाट गएको छ । केही वर्ष अघिसम्म विकासमा ओझेलमा परेको काभ्रे गाउँमा अहिले भने घरघरमा खानेपानीसँगै टोलटोलमा पदमार्ग निर्माण भएको छ । सडकदेखि पाँच मिनेटको पैदलयात्रामा पुगिने काभ्रे गाउँका सबै टोलमा पदमार्ग बनाइएको छ ।
उकालो भू–भागमा सिँढी र गाउँभित्रको फाँटमा ढलान गरेर पदमार्ग बनाएपछि गाउँमा आवतजावत गर्न सहज भएको छ भने बाटो सफा र चिटिक्क बनेको छ । काभ्रेगाउँदेखि मुरलीबाङ, कामखोलादेखी भुमेथान, डुङडुङदेखि कामखोलासम्म पदमार्ग बनाइएको छ । पदमार्ग बनेपछि गाउँमा हिँड्डुल गर्न सहज भएको स्थानीय ८० वर्षीया लालमायाँ चोचाङ्गीले बताउनुभयो ।

“पहिले हिँड्ने डोरो मात्रै थियो, बाटैभरि झाडी हुन्थ्यो, एताउता गर्दा चिप्लिएर लड्ने डर हुन्थ्यो, अहिले त खुट्टा ठोक्एिला भन्न नी परेर, बाटो बनेपछि हामी वृद्धवृद्धाहरु पनि सजिलै गाउँ घुम्न सक्छौँ”, चोचाङ्गीले भन्नुभयो । काभ्रेगाउँदेखि पर्यटकीयस्थल बाजा बज्ने ढुङ्गा जाने पदमार्ग निर्माण गर्न थालिएको छ ।

रुप्से झरना, अन्धगल्छी, बाजा बञ्ने ढुङ्गालगायत चर्चित पर्यटकीयस्थल रहेको अन्नपूर्ण गाउँपालिका–३ दानाको काभ्रे गाउँमा मात्रै होइन अन्य बस्ती र टोलमा ‘एक घर एक धारा खानेपानी’ र पदमार्ग बनाउने अभियान थालिएको छ । विकास निर्माणमा सडक नै पहिलो प्राथमिकतामा पर्ने गरेको सन्दर्भमा दानामा भने घरघरमा खानेपानीको सुविधा र टोलटोलमा पदमार्ग निर्माणलाई प्राथमिकतामा राखेर योजना अघि बढाइएको वडाध्यक्ष रमेश पुर्जाले जानकारी दिनुभयो ।

“सडक सञ्जालले पहिरो र भूक्षयको जोखिम बढेपछि हामीले नयाँ सडकको ट्याक निर्माणलाई रोकेर परम्परागत गोरेटो बाटोलाई स्तरोन्नति गरी पदमार्ग बनाउने अभियानको सुरुवात गरेका छौँ, टोलटोलमा जाने परम्परागत गोरेटोबाटोलाई पदमार्गको रुपमा विकास गर्ने र घरघरमा खानेपानी पु¥याउने योजना अघि बढाएका छौँ”, वडा अध्यक्ष पुर्जाले भन्नुभयो ।

आर्थिक वर्ष २०८०÷०८१ मा यस वडा कार्यालयले सञ्चालन गरेका पूर्वाधार निर्माण योजनाबाट दानाको चौतारादेखि कोटसम्म, तीतरदेखि थाडाटोलसम्म पदमार्ग बनाइएको छ भने ठाटीटोलदेखि शिवालय मन्दिरसम्म नालीको पदमार्ग बनाइएको छ ।

गत आर्थिक वर्षमा वडा कार्यालयले सञ्चालन गरेको आठ वटा पदमार्ग निर्माण योजनाबाट दुई किलोमिटर दुई सय मिटर पक्की पदमार्ग निर्माण गरिएको वडाका असिस्टेन्ट सव इञ्जिनीयर मुकेश सैसवालले जानकारी दिनुभयो । सो योजनाका लागि पालिकामार्फत रु ५२ लाख बजेट विनियोजन भएको थियो । परम्परागत साँघुरा डोरो भएको बाटोमा सिँढी चिनेर पदमार्ग बन्न थालेपछि एक गाउँदेखि अर्को गाउँ जाने बाटो व्यवस्थित, सफा र चिटिक्क बनेको दानाका वडा सदस्य लालबहादुर पुनले बताउनुभयो ।

सङ्घीय खानेपानी तथा ढल व्यवस्थापन आयोजनामार्फत मतिचौरको खानेपानी मुहानबाट गाउँसम्म मुख्य पाइपलाइन र पानी ट्याङ्की निर्माण गरिसकिएको छ भने वितरण पाइपलाइनमार्फत दानाको डाँडागाउँ, रिग्म, घट्टेडाँडा, वडा कार्यालय लगायतका बस्तीमा एक घर एक धारा खानेपानी सुविधा विस्तारको चरनमा रहेको छ ।