काठमाडौँ – राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले संविधान संशोधन गर्ने नै हो भने धर्मनिरपेक्षा र सङ्घीयताबारे पुनःविचार गर्नुपर्ने जिकिर गुर्नभएको छ । राप्रपा नेपाल निकट मानवअधिकार तथा कानुन विभागद्वारा यहाँ आयोजित ‘नेपालको संविधान २०७२ ः ९ वर्षको अनुभव’ विषयक विचार गोष्ठीमा उहाँले देशलाई भ्रष्टाचारमुक्त गर्ने गरी शासकीय स्वरूप बदल्नुपर्ने धारणा राख्नुभयो ।
राप्रपा नेपालका वरिष्ठ नेता एवं वरिष्ठ अधिवक्ता विष्णु भट्टराईले जनताको चेतनास्तर सँगसँगै संविधानलाई पनि समयानुसार संशोधन गर्नुपर्ने अवस्थाता औँल्याउनुभयो । वरिष्ठ अधिवक्ता डा चन्द्रकान्त ज्ञवालीले पनि संविधानलाई समयानुकूल परिवर्तन गर्न आवश्यक रहेको धारणा राख्नुभयो ।
यस्तै वरिष्ठ अधिवक्ता डा सुरेन्द्र भण्डारीले वर्तमान निर्वाचन प्रणालीले देशमा भ्रष्टाचारलाई थप मलजल गरेकाले यस विषयमा गम्भीर समीक्षा गरेर अगाडि बढ्न आवश्यक रहेकामा जोड दिनुभयो । संविधान संशोधन गर्दा हिन्दू, बौद्ध, किरातलगायत सभ्यतालाई कायम राख्न उहाँले आग्रह गर्नुभयो । मानवअधिकार तथा कानुन विभागका महासचिव एवं अधिवक्ता भूपेन्द्रप्रसाद पोखरेलले सबैको सहमतिमा समय सान्र्दभिक संविधान संशोधन हुनुपर्ने धारणा राख्नुभयो ।
