काठमाडौँ – अर्थसचिव मधुकुमार मरासिनीले आर्थिक वृृद्धिदर सात प्रतिशतसम्म पुर्याउन सकिने धारणा व्यक्त गर्नुभएको छ । नेपाल आर्थिक पत्रकार सङ्घ (नाफिज)ले आइतबार आयोजना गरेको बैंकिङ क्षेत्रमा जोखिमपूर्ण सम्पत्तिको व्यवस्थापन विषयक छलफलमा उहाँले अर्थतन्त्रमा चाँडो सुधार ल्याउन कर्जा प्रवाहमा बैंक लचिलो हुनुपर्ने बताउनुभयो ।
उहाँले भन्नुभयो, “पछिल्लो समय अर्थतन्त्र सुधार हुँदै गएको छ । यसरी सुधार हुँदै गए आर्थिक वृद्धिदर सात प्रतिशतसम्म पु¥याउन सकिन्छ, हामीले छ प्रतिशतको मात्रै लक्ष्य राखेका छौँ, त्योभन्दा पनि बढी हासिल गर्ने गरी काम गर्न सकिने स्थिति बनिरहेको छ ।”
प्रतिव्यक्ति आयको हिसाबमा एसियामा नेपाल केही पछाडि भए पनि वित्तीय स्थिरता तथा आधारभूत सूचकहरूमा अन्य देशको तुलनामा अगाडि नै रहेको सचिव मरासिनीले बताउनुभयो ।
नेपाल राष्ट्र बैंकका गभर्नर महाप्रसाद अधिकारीले बैंकिङ क्षेत्रको खराब कर्जा र समग्र अर्थतन्त्रमा सुधार ल्याउन सहकारी क्षेत्रमा सुधारको खाँचो औँल्याउनुभयो । देशको अर्थतन्त्रमा सहकारी क्षेत्रको योगदान महत्वपूर्ण भएको बताउँदै उहाँले सहकारीहरु बैंक जस्तो भएर अगाडि बढ्दा समस्या आएकाले दोस्रो तहको नियामक आवश्यक रहेको उल्लेख गर्नुभयो ।
अर्थ मन्त्रालयका सहसचिव नारायणप्रसाद रिसालले बैंक तथा वित्तीय क्षेत्रबाट प्रवाहित कर्जा कुन क्षेत्रमा प्रयोग भएको भन्ने विषयको प्रभावकारी नियमन नहुँदा पनि समस्या सिर्जना भएको बताउँदै वित्तीय क्षेत्र सुधारका लागि सरोकारवाला पक्षसँगको समन्वयमा वित्तीय सुधार रणनीति बनाउने तयारी भएको जानकारी दिनुभयो ।
राष्ट्र बैंकका कार्यकारी निर्देशक गुरुप्रसाद पौडेल, वरिष्ठ अर्थविद् नरबहादुर थापालगायतले अहिले आर्थिक मन्दीका कारण निर्माण तथा उद्योग क्षेत्रमा नकारात्मक वृद्धिदर रहेकाले बैंकिङ क्षेत्रमा पनि असर परेको बताउँदै त्यस क्षेत्रको सुधारले बैंकिङ क्षेत्र पनि चलायमान हुने विश्वास व्यक्त गर्नुभयो ।
