गण्डकी, ७ असार : गण्डकी प्रदेशका सभामुख कृष्णप्रसाद धितालले ज्येष्ठ नागरिको ज्ञान, सीप र अनुभवको उपयोग गर्नुपर्ने बताउनुभएको छ ।
राष्ट्रिय ज्येष्ठ नागरिक महासङ्घ केन्द्रीय समितिको आयोजना एवम् महिला तथा बालबालिका मन्त्रालयको सहयोगमा पोखरामा आज आयोजित ज्येष्ठ नागरिक संस्थाहरुको अनुगमनमा सरोकारवालासँग भएको अन्तरक्रिया कार्यक्रममा सभामुख धितालले ज्येष्ठ नागरिक समाजका जिउँदा इतिहास भएको उल्लेख गर्नुभयो । उहाँले ज्येष्ठ नागरिकको योगदानको कदर गर्दै उनीहरुबाट सामाजिक, आर्थिक र राजनीतिक क्षेत्रको ज्ञान नयाँ पुस्ताले लिनुपर्ने आवश्यकता औँल्याउनुभयो । ज्येष्ठ नागरिकलाई घरघरमा पुगेर राष्ट्रिय परिचयपत्र वितरण गर्ने व्यवस्था मिलाउनु आवश्यक भएको सभामुख धितालको भनाइ थियो ।
कार्यक्रममा विभिन्न ज्येष्ठ नागरिकलाई सम्मानित गरिएको थियो । सो अवसरमा ‘हेप्पी हेल्प’का संस्थापक डा यज्ञमान शाक्य, राधाकृष्ण वृद्धाश्रमका प्रेम लिगल, दलित महासङ्घका केन्द्रीय अध्यक्ष खरिलाल विश्वकर्मा, ज्येष्ठ नागरिक समिति पोखरा–१७ अध्यक्ष टोपराज ढुङगाना, उपाध्यक्ष विष्णुमाया बास्तोला र समाजसेवी गिरा पन्त कोइरालालाई पनि सम्मान गरिएको थियो । सो अवसरमा महासङ्घका महासचिव कुशुमकेशव पराजुली र आयुर्वेद चिकित्सक बिपी रेग्मीले ज्येष्ठ नागरिकका हकअधिकारका विषयमा छुट्टाछुट्टै कार्यपत्र प्रस्तुत गर्नुभएको थियो ।
