मुम्बई । बलिउड अभिनेता सलमान खान अर्का अभिनेता अरबाज खानको च्याट सो ‘पिन्च सिजन २’ मा देखिएका छन् । अरबाजले कार्यक्रममा सलमानलाई सामाजिक सञ्जालमा क–कसलाई फलो गरेका छन् भनेर प्रश्न सोधेका थिए । ट्वीटरमा चार करोडभन्दा बढी फलोअर्स भएका सलमानले जम्मा २५ जनालाई फ्लो गरेका छन् । इन्स्टाग्राममा पनि उनको त्यति नै फलोअर्स् छन् तर उनले भने थोरैलाई मात्र फ्लो गर्ने गरेको भारतीय सञ्चार माध्यमले जनाएका छन् ।
अरबाजले तीन अभिनेत्री कट्रिना कैफ, संगीता बिजलानी र अथिया सेट्टीको नाम लिँदै यीमध्ये कुन अभिनेत्रीलाई इन्स्टाग्राममा फ्लो गरेका छैनन् भनेर सलमानलाई प्रश्न गरेका थिए । सुरुमा सलमानले आफ्नी पूर्वप्रेमिका संगीता बिजलानीलाई आफूले फ्लो नगरेको जवाफ दिए । अरबाजले भने सलमानले अभिनेता सुनिल सेट्टीकी छोरी अथिया सेट्टीलाई फलो नगरेको बताए । अरबाजको कुरा सुन्नेबित्तिकै सलमानले दुई हात जोडेर कार्यक्रमकै बीचमा अथियासँग माफी मागे र उनलाई अबदेखि फ्लो गर्ने बताए ।सौर्य दैनिकमा खबर छ ।
अभिनेत्री अथियाले अहिलेसम्म अरबाजको उक्त सो वा सलमानको माफी सम्बन्धमा कुनै प्रतिक्रिया दिएकी छैनन् । उनका बुबा सुनिल सेट्टीले भने सलमानको माफी माग्ने तरिका ‘क्युट’ लागेको जनाएका छन् । सुनिलले भने, ‘सलमान हाम्रो परिवार हो । उनी जुनै काम पनि आफ्नो मनबाट गर्छन् । जब उनले कार्यक्रममा अथियासँग माफी मागे, त्यो निकै प्यारो थियो । उनीहरुबीच राम्रो सम्बन्ध छ र म सलमानसँगको मेरो सम्बन्धलाई पनि कदर गर्छु ।’
योसँगै अरबाजले सलमानको दुबईमा गोप्य परिवार भएको हल्लाबारे समेत प्रश्न सोधेका थिए । सलमानको अभिनयमाथि उठेको प्रश्नमाथि कुराकानी गर्दै अरबाजले बलिउडका बारेमा चर्चा गरेका थिए । यसैगरी ‘पिन्च सिजन २’ को अन्य एपिसोडमा अभिनेता टाइगर श्राफ, फरआन अख्तर, अभिनेत्री अनन्या पाण्डे, कायरा आडवानी, राजकुमार राव र फरआन खान उपस्थित हुने जनाइएको छ ।
